Ministry zamiežnych spraŭ Litvy Linas Linkiavičus i Biełarusi Uładzimir Makiej. Fota Sb.by.
Ministr zamiežnych spravaŭ Biełarusi Uładzimir Makiej 5 sakavika skazaŭ, što «Biełaruś hatovaja da padpisańnia klučavych dakumientaŭ ź ES, ale jość pazicyja adnoj krainy».
«Hetyja dakumienty, z našaha punktu hledžańnia, možna było b padpisać choć zaŭtra. Ale, na žal, tak atrymlivajecca, što z-za pazicyi adnoj krainy Jeŭrasajuz stanovicca zakładnikam palityki hetaj krainy. Bo adna kraina pieranosić niejkija prablemnyja niuansy ŭ dvuchbakovych adnosinach na ŭsiu palityku Jeŭrasajuza», — adznačyŭ Makiej.
Pra jakuju ž krainu viadziecca havorka? Krynica, blizkaja da biełaruskich dypłamatyčnych kołaŭ, paviedamiła nam, što, chutčej za ŭsio, ministr vykazaŭsia tak pra Litvu. Šmat supiarečnaściaŭ miž Biełaruśsiu i Litvoj vyklikaje budaŭnictva našaj krainaj atamnaj stancyi na miažy z hetaj krainaj.
Kaardynatar prahramy «Minskaha dyjałohu» Dzianis Mieljancoŭ paćvierdziŭ zdahadki, što havorka, imavierna, viadziecca pra Litvu, ale padkreśliŭ, što jość supiarečnaści i z Polščaj u adnym pytańni.
«Hledziačy pra jakija pieramovy havaryŭ spadar ministr. Kali pra «Pryjarytety partniorstva», to heta Litva praz AES. Kali pra spraščeńnie vizavaha režymu — to Polšča, jana choča asobny dakumient, jaki b dazvalaŭ krainam Jeŭrasajuza mieć u Biełarusi nieabmiežavanuju kolkaść konsułaŭ.
Naš bok niepakoicca, što polskija dypłamaty buduć masava vydavać karty palaka. Taksama ŭ takim vypadku nie pracuje pryncyp uzajemnaści», — adznačaje Dzianis Mieljancoŭ.
