Ad siońniašniaha dnia spyniła vytvorčaść akcyjaniernaje tavarystva «Dobrušskaja papiarovaja fabryka «Hieroj pracy».
Kalektyŭ pradpryjemstva, akramia dziažurnych słužbaŭ, sychodzić u adpačynak.
Na fabrycy ciapier pracuje amal 1200 čałaviek. Niavykarystany adpačynak albo častku jaho maje prykładna tracina kalektyvu.
Astatnija pojduć u vymušany adpačynak z zachavańniem dźviuch tracinaŭ zarobku — z raźliku siaredniamiesiačnaj staŭki ŭ pamiery 220 tysiač rubloŭ.
Kaladna‑navahodnija vakacyi «Hieroja pracy» raspačatyja nie ad dobraha žyćcia. Da hetaha spryčyniŭsia finansavy kryzis, jaki istotna paŭpłyvaŭ na zbyt papiarovaj pradukcyi.
Namieśnica hienieralnaha dyrektara fabryki ŭ pytańniach ekanomiki Taćciana Ćvierdakova tak patłumačyła našamu radyjo situacyju, jakaja skłałasia na pradpryjemstvie:
«Spyniajemsia: niama spažyŭcoŭ. Na skład nie možam kłaści pradukcyju, bo zamarožvajucca abarotnyja srodki i ŭsio inšaje. My na ekspart adhružali pradukcyju va Ukrainu i Rasiju.Ciapier Ukraina admoviłasia ad našaj pradukcyi ŭ suviazi z abvałam kursu hryŭni. A Rasija — jany ž taksama na kanikuły sychodziać».
Jak stała viadoma, adpačynki j vakacyi buduć ciahnucca na papiarovaj fabrycy da 12 studzienia. Adnak nichto nie biarecca ciapier prahnazavać, jak źmienicca situacyja da taho času.
***
Papiarovaja fabryka ŭ Dobrušy zasnavanaja jašče ŭ 1870 h. Heta horadaŭtvaralnaje pradpryjemstva, jakoje daje asnoŭnuju častku pastupleńniaŭ u miascovy biudžet. Siarod pradukcyi — školnyja i ahulnyja sšytki, błaknoty, papiera dla piśma, malavańnia m čarčeńnia.
Tut asvojena technałohija vyrabu papiery z adkidaŭ vytvorčaści «tetra‑pak» i łaminavanaha kardonu.
Sioleta fabryka pačała vypuskać pradukcyju z termapapiery, u tym liku papieru dla faksaŭ, stužki dla terminałaŭ i bankamataŭ.