Mitrapalit Pavieł (Lebiedź). Fota spzh.news.
Namieśnik Kijeva-Piačerskaj łaŭry, jepiskap Ukrainskaj Pravasłaŭnaj carkvy Maskoŭskaha patryjarchatu (UPC MP) mitrapalit Pavieł (Lebiedź) raspavioŭ, što paśla jaho praklonu pamierli niekalki čałaviek, jakija pracavali ŭ muziejnych majsterniach na terytoryi manastyra. Z hetym pryznańniem jon vystupiŭ u chodzie hutarki, apublikavanaj na YouTube-kanale «Łaŭra. Šlach da nieba» (z 24:30).
Mitrapalit uzhadaŭ pra dyskusii adnosna vysialeńnia z hetych majsterniaŭ. «Ja skazaŭ, što [jany] pamruć, kali nie syduć. I ŭ adzin dzień try čałavieki pamierli. Paśla hetaha jany napisali adkryty list-skarhu na mianie Błažeńniejšamu mitrapalitu Uładzimiru», — paviedamiŭ jon.
U chodzie hutarki sa źvierchnikam UPC MP mitrapalit Pavieł ŭbačyŭ, što ŭ taho «z vačej iduć iskry». «Jon spytaŭ mianie: «Vy što sabie dazvalajecie? Vy praklali muziejščykaŭ, i ŭ ich pamierła try čałavieki». Ja kažu: «Da viečara pamracie ŭsie. U imia Ajca, i Syna, i Śviatoha Duchu». Nu, praŭda, jašče adzin čałaviek pamior. Jany chucieńka zmylisia», — uspomniŭ jon detali razmovy.
Kankretnuju datu, kali hutarka mieła miesca, namieśnik Kijeva-Piačerskaj łaŭry nie nazvaŭ, adnak viasnoj 2007 hoda «Komsomolskaja pravda v Ukrainie» apublikavała materyjał pra kanflikt pamiž śviatarami i supracoŭnikami dziejučaha na terytoryi łaŭry Nacyjanalnaha Kijeva-Piačerskaha historyka-kulturnaha zapaviednika — samaha vialikaha muziejnaha kompleksu Ukrainy. Śviatary nibyta zapatrabavali ad supracoŭnikaŭ vyzvalić niekalki budynkaŭ kompleksu i pieradać ich carkvie.
«Sam momant praklona dobra pamiataju. Śviatar «adaryŭ» mianie chrosnym znakam sa słovami: «Jak ja vas usich nienavidžu! Budu malicca, kab da Vialikadnia vy nie dažyli!», — kazaŭ vydańniu navukovy supracoŭnik Kijeva-Piačerskaha zapaviednika. — Vy b bačyli jaho vočy: kolki ŭ ich było nianaviści i złości! Adna sprava, kali praklony pramaŭlaje zvyčajny, śviecki čałaviek. Ale ž heta čałaviek vysokaha duchoŭnaha sanu. I kazać takoje na śviatoj ziamli! U Vialiki post!».
