Fota Voli Aficeravaj
Pra heta kiraŭnik MZS Biełarusi zajaviŭ u intervju japonskaj teleradyjokampanii NHK. Tekst źmieščany na sajcie Ministerstva zamiežnych spraŭ.
«Siońnia my nie ličym, što niechta z vajenna-palityčnych hulcoŭ pradstaŭlaje pramuju pahrozu dla našaj biaśpieki. Ciapier składana sabie ŭjavić, što niechta b advažyŭsia napaści na Biełaruś, jak heta było ŭ minułym stahodździ, kali my stracili ŭ Druhoj suśvietnaj vajnie adnu tracinu svajho nasielnictva. Ale my nie možam abyjakava prachodzić mima faktaŭ, jakija lažać na pavierchni», — miarkuje U. Makiej.
«My bačym, što ciapier adbyvajecca ŭ susiednich z nami krainach, jakija ŭvachodziać u błok NATA. Raźmiaščajucca novyja vajskovyja bazy, adbyvajecca pašyreńnie błoku NATA na Uschod, hetyja bazy raźmiaščajucca niepasredna kala našych miežaŭ. My bačym, što ŭ Polščy, krainach Bałtyi, inšych krainach razdajucca niejkija novyja zajavy ab tym, kab dadatkova raźmiaścić amierykanski vajenny kantynhient, niekatoryja krainy navat hatovyja zapłacić za heta.
Viedajecie, usia historyja kaža pra toje, što porach zaŭsiody treba trymać suchim. My ŭziali ŭroki z hetaj historyi, jakaja dla našaha naroda čaściakom była trahičnaj. My zychodzim tut z razumnaj metazhodnaści — zabieśpiačeńnie naležnaj abaranazdolnaści dziaržavy, naležnaha ŭzroŭniu padrychtoŭki našych uzbrojenych siłaŭ. U vypadku, kali ŭźniknie niejkaja pramaja pahroza dla biaśpieki našaj krainy, my pavinny być hatovyja dać adpor ahresaru, jak heta pryniata kazać.
Fota MZS
Prakamientavaŭ ministr i niadaŭna ŭźnikłyja sprečki z Rasijaj.
«Da našaha vialikaha škadavańnia, časam u našych adnosinach źjaŭlajucca momanty, źviazanyja, ja b skazaŭ, z paviarchoŭnaj štučnaj buchhałteryjaj, kali padličvajecca, chto i kolki pakłaŭ na šali ŭ toj ci inšaj śfiery supracoŭnictva i chto kamu pavinien. My zychodzim z taho, što my — brackija družalubnyja dziaržavy i, pracujučy ŭ ramkach i Sajuznaj dziaržavy, i Jeŭrazijskaha ekanamičnaha sajuza, pavinny imknucca da stvareńnia ŭ JEAES adzinaj ekanamičnaj prastory, jakaja dazvoliła b zabiaśpiečyć svabodnaje pieramiaščeńnie tavaraŭ, pasłuh, kapitału i pracoŭnaj siły», — miarkuje jon.
Pry hetym kiraŭnik MZS zaklikaŭ, «nie rabić z hetaha trahiedyju», bo ŭsie hetyja pytańni ŭźnikali i raniej, ale vyrašalisia šlacham dyjałohu.
Pa słovach Makieja, ekanomiki Biełarusi i Rasii ciesna pieraplecieny, tamu krainam treba iści dalej pa šlachu stvareńnia adzinaj pramysłovaj, adzinaj sielskahaspadarčaj palityki.
«Kažučy pra toje, što my sapraŭdy źjaŭlajemsia ciesnymi sajuźnikami z Rasijaj, ja, tym nie mienš, chacieŭ by padkreślić, što Biełaruś, jak lubaja niezaležnaja dziaržava, imkniecca pravodzić i pravodzić źniešniuju palityku, handlova-ekanamičnuju palityku zychodziačy z absalutna ŭłasnych nacyjanalnych intaresaŭ. My zychodzim u našaj palitycy z taho, što nieabchodna našaj krainie, što važna dla našaha naroda. Zrazumieła, što my ciesna ŭzajemaźviazany, ale, tym nie mienš, Biełaruś, jak niezaležnaja, suvierennaja dziaržava, zaŭsiody imknułasia pravodzić i budzie pravodzić absalutna niezaležnuju źniešniuju palityku, jakaja nakiravana na karyść naroda», - padkreśliŭ Makiej.
