Paśla anieksii Kryma i pačatku kanfliktu na Danbasie Ukraina stała «vyprabavalnym palihonam» dla infarmacyjnych i kibiervajennych apieracyj rasijskaha HRU, piša The Washington Post.
Pavodle haziety, bolšaść hetych napadaŭ ažyćciaviła padraździaleńnie HRU 54777, jakoje śpiecyjalizujecca na psichałahičnych apieracyjach i kibieratakach.
U jakaści adnaho z prykładaŭ apieracyj hazieta napisała pra rassyłańnie amierykanskim palitykam lista ad imia «patryjotaŭ Ukrainy».
U lutym 2015 hoda, praz hod paśla anieksii Kryma i pačatku kanfliktu na ŭschodzie Ukrainy, tuzin amierykanskich sienataraŭ atrymali adnolkavyja elektronnyja listy ad čałavieka, jaki nazvaŭ siabie pradstaŭnikom hrupy Patryjoty Ukrainy. U ich źmiaščałasia spasyłka na pietycyju z zaklikam «vyratavać Ukrainu».
Jak adznačaje The Washington Post, prašeńnie było składziena na kiepskaj anhlijskaj i ŭklučała ŭ siabie taki tekst: «Sienatary i kanhresmieny ZŠA! Siońnia situacyja ŭ Ukrainie vielmi składanaja. Ukraina ŭ stanie vajny… Uzrovień karupcyi va Uzbrojenych siłach Ukrainy vielizarny. Vysokapastaŭleny aficer pradaje zbroju terarystam».
Dalej u liście była prośba adpravić «vopytnych śpiecyjalistaŭ ZŠA i NATA» na zamienu aficeram ukrainskich Uzbrojenych sił. «My spadziajemsia, što vy zmožacie paŭpłyvać na Bieły dom, Pientahon i Dziaržaŭny departamient ZŠA, kab dasiahnuć pahadnieńnia ab adpraŭcy zachodnich aficeraŭ va Ukrainu dla [ŭstanaŭleńnia] pramoha kantrolu nad našymi ŭzbrojenymi siłami», — havaryłasia ŭ pietycyi, kopiju tekstu jakoj haziecie pieradali ŭ adnoj z zachodnich raźviedak.
Pry hetym kanhresmienaŭ-adrasataŭ pasłańnia vybirali z proźviščaŭ sa śpisu sienataraŭ ZŠA ŭ ałfavitnym paradku — listy atrymali tolki pieršyja ź ich.
Dziŭnaja pietycyja nie atrymała vodhuku ŭ Sienacie i nie mieła asablivych nastupstvaŭ, adnak była pieršaj, choć i hrubaj sprobaj rasijskaha HRU paŭpłyvać na amierykanskich palitykaŭ za apošnija hady, pieradaje The Washington Post.
Kampanija mieła padvojnuju metu: «jašče bolš demaralizavać ukraincaŭ paśla ciažkich strat pieršaha hoda vajny i ŭvieści ŭ zman palitykaŭ ZŠA — prymusiŭšy ich pavieryć, što sami ukraincy stracili vieru ŭ svaje ŭzbrojenyja siły».
