Pry kancy 2018 u vydaviectvie «Halijafy» vyjšła jašče niekalki knih: paezija Viery Burłak, doŭhačakany raman Aleny Brava, aŭdyjokazka «Pakatun i Palažun», trochtomnik Uładzimira Maroza, kniha vieršaŭ Usievałada Harački, albom padarožžaŭ Juzafa Piłsudskaha pa Biełarusi, novaja kniha Valera Hapiejeva «Pazł», jakuju možna pieradzamović pa mienšaj canie.
Padrabiazna pra kožnuju z knih — čytajcie nižej.
Viera Burłak. Fantaziurki
Što śpiavajuć roznyja mašyny? Adkul biarucca i kudy źnikajuć začaravanyja domiki? Jakija padziei razhortvajucca ŭ łužynach?
Amataram pafantaziravać, małym i vialikim, — novaja knižka vieršaŭ Viery Burłak.
Alena Brava. Sadomskaja jabłynia
U novym tvory aŭtarki pravakacyjnaha ramana «Mienada i jaje satyry»
televiadoŭca Inha Kurodym viadzie pryvatny repartaž, poŭny horkaha sarkazmu, z epicentra «zvyčajnaj nadzvyčajnaj situacyi», dzie žančyny — «zručnyja čałaviekaadzinki štatnaha raskładu».
Hramadstva hatovaje bačyć u žančynie najpierš maci, potym — pracaŭnicu, istotu «pryhožuju, piaščotnuju i kryšačku ranimuju, asabliva ŭ dzień, kali čutnyja pieršyja ciažkija kroki viasny pa našaj płaniecie, i vam dorać kvietki z antypryharnymi patelniami».
Raman možna čytać jak pazbaŭlenuju tabu spoviedź sučaśnicy, jak satyru na karumpavanuju pravincyjnuju biurakratyju albo jak «historyju chvaroby». Humar idzie pobač ź simvałam i mifam, saładžavaja mova ružovaha čytva źmianiajecca brutalnym prastamoŭjem, biaźlitasny psichałahičny analiz susiedničaje sa ščyraściu intymnaha dziońnika.
Bryhita Šer. Pakatun i Palažun (aŭdyjokniha)
Piatnaccać paetyčnych historyj z žyćcia, jakija dapamahajuć navučycca nazyvać roznyja stany i pačućci, što byvajuć pamiž ludźmi.
Uładzimir Maroz. Vybranaje
Vieršy, proza, ese paeta i kinadakumientalista Uładzimira Maroza ŭ troch tamach. Sieryja «Kniharnia piśmieńnika».
Nakład — usiaho 80 asobnikaŭ.
Usievaład Haračka. Kalarovyja ślozy
U knihu ŭvajšli vieršy, napisanyja aŭtaram pieravažna ŭ pieryjad z 2005 pa 2009 h. Jany vyznačajucca aryhinalnym asensavańniem rečaisnaści, šyrokim nastrajovym i tematyčnym dyjapazonam. Niahledziačy na niekatoryja asablivaści, što nibyta zbližajuć vieršy zbornika z peŭnymi navatarskimi płyniami, ich chutčej varta razhladać jak praciah kłasičnaj tradycyi ŭ biełaruskaj paezii.
Juzaf Piłsudski. Kresavyja apoviedy
«My addajom u vašyja ruki niezvyčajnuju knihu — staronki padarožžaŭ Juzafa Piłsudskaha pa ziemlach ciapierašniaj Biełarusi, upryhožanyja ŭnikalnymi fotazdymkami, aniekdotami, kurjozami…» —
pišuć składalniki D.Kraŭčanka i E.Inieŭska. Na biełaruskaj i polskaj movach.
Siarhiej Biełajar. Rasśledavańni inśpiektara Sarvy
Navukova-fantastyčnyja apaviadańni. Mižpłanietnyja pieraloty, žyćcio na Marsie, kryminał…
U XXII stahodździ źmianilisia ŭmovy žyćcia, prahres prahłynuŭ čałaviectva biez astatku, ale złačynstvy nie źnikli.
Dy, na ščaście, źjaviŭsia pierajemnik Šerłaka Chołmsa — inśpiektar Departamienta pazaziemnych kryminalnych rasśledavańniaŭ Rataŭt Sarva.
Valer Hapiejeŭ. Pazł
Što naš los, jak nie vynik dziejnaści dziasiatkaŭ i socień čałaviek vakoł? Što mistyka, jak nie źbieh šmatlikich abstavin? Što čałaviek u sistemie? Što ŭrešcie naša žyćcio, jak nie adziny vializny pazł, dzie kožny frahmient sčaplajecca ź inšymi…
Žorstki realizm na zrezie sučasnaha biełaruskaha hramadstva z hierojami ad uładnych čynoŭnikaŭ da badziakoŭ, bieź mifaŭ pra talerantnaść i rachmanaść, bieź sientymientaŭ i sprobaŭ škadavańnia — u novym ramanie Valera Hapiejeva.
Da siaredziny studzienia knihu možna zamović pa nižejšaj canie.