Raspačaŭsia tradycyjny mižnarodny turnir pa hreka-rymskaj baraćbie, na adkryćci jakoha prysutničaŭ kiraŭnik prezidenckaha spartovaha kłuba Źmicier Łukašenka.
Pieršapačatkova praviadzieńnie turnira płanavałasia ažyćciavić u nievialikaj zale baraćby, ale płany miascovych uładaŭ kardynalna źmianilisia, kali stała viadoma, što na adkryćci maje prysutničać Źmicier Łukašenka. U vyniku turnir pierajechaŭ u ladovy pałac sporta.
U suviazi z pryjezdam Źmitra Łukašenki milicejski harnizon Harodni pieraviedzieny ŭ stan padvyšanaj bojehatoŭnaści. U svoj čas čynavienstva atrymała zahad zabiaśpiečyć nieabchodnuju kolkaść hledačoŭ, a heta pryblizna 3000 čałaviek — mienavita stolki źmiaščajuć trybuny ladovaha pałaca. Jak zaŭsiody, vyratavali školniki i studenty: kožnaja navučalnaja ŭstanova atrymała adpaviednuju kvotu i prymusiła navučencaŭ razam z nastaŭnikami prysutničać na adkryćci spabornictvaŭ.
Što da samoha turnira, to ŭdzieł u im biaruć najmacniejšyja spartoŭcy ź Biełarusi, Čechii, Polščy, krain Bałtyi, a taksama Rasii i Izraila.
