200 hadoŭ tamu, 24 śniežnia 1818 hoda, upieršyniu prahučała pieśnia «Cichaja noč».
Napiaredadni Rastva Chrystova 1818 h. u miastečku Abierndorf u Aŭstryi vyjaviłasia prablema, što arhany całkam nie hrali, i tamu treba było terminova niešta prydumać. Ranicaj 24 śniežnia tamtejšy ksiondz Jozef Mor źviarnuŭsia da arhanista Franca Hrubiera z prapanovaj napisać miełodyju dla hitary na vierš, jaki Mor napisaŭ dva hady tamu. Franc Hrubier uziaŭsia za pracu, i ŭžo ŭviečary pad akampaniemient hitary pad sklapieńniami kaścioła sv. Mikałaja ŭ Abierndorfie zahučali słovy: «Cichaja noč, śviataja noč…» ŭ vykanańni Jozefa Mora i Franca Hrubiera.
Na nastupny hod u Abierndorf pryjechaŭ majstar pa ramoncie arhanaŭ Karł Maŭrachier, jaki adramantavaŭ arhan, a taksama atrymaŭ słovy i miełodyju novaha śpievu. Užo na Rastvo 1819 h. «Cichaja noč» hučała ŭ kaściołach u vakolicach Zalcburha, a jašče praź niekalki hadoŭ jaje vykonvała karaleŭskaja kapeła ŭ Vienie.
Na siońnia «Cichaja noč» — heta adzin z najbolš papularnych kaladnych śpievaŭ, pierakładzieny na 140 moŭ. Na biełaruskuju pieśniu pierakłała Natalla Arsieńjeva.
Cichaja noč, śviataja noč!
Usio śpić, śnić daŭno.
Tolki Maci Śviataja ŭściaž
Cicha ŭ jaślach lulaje dzicia —
Śpi, Synočak mały,
Luli, luli, śpi.
A ŭhary ŭsio haryć
Sierabrom zornych kryh,
Chor aniołaŭ piaje pastuchom
Ab dziciaci, što budzie Chrystom,
Śvietłaj pieśniaj chvały
Słaviać Zbaŭcu ziamli.
Słaviać Zbaŭcu ziamli.
U rodny kraj zavitaj,
Ludziam sum i tuhu razhani,
Chaj ža ciešacca ŭ hetyja dni,
U cichuju, śviatuju noč!
U cichuju, śviatuju noč!
Śpieŭ uklučany ŭ śpis niemateryjalnaj kulturnaj spadčyny JUNIESKA.
26 śniežnia ŭ kamiernaj zale Vialikaha teatra opiery i baletu ŭ Minsku adbudziecca ŭračysty kaladny kancert z nahody 200-hodździa śpievu «Cichaja noč». Arhanizatary kancertu — pasolstva Aŭstryjskaj Respubliki ŭ Respublicy Biełaruś i Vialiki teatr opiery i baletu Biełarusi.
Minski kancert z nahody 200-hodździa pieśni «Cichaja noč» projdzie z udziełam salistaŭ Tomasa Vajnchapiela (Aŭstryja) i Julii Lebiadzienka (Biełaruś/Aŭstryja).
