Biełaruski nacyjanalny kanhres (BNK) pryniaŭ rašeńnie vyłučyć svajho kandydata ŭ prezidenty. Vyłučeńnie adbudziecca 17 studzienia 2019 hoda.
Vyłučać svaje kandydatury majuć prava ŭsie subjekty BNK, siabry rady, a taksama rehijanalnyja kaalicyi. «Kožny z kandydataŭ pavinien pradstavić svaju stratehiju pieramohi, adbudziecca hałasavańnie, i budzie kandydat», — kaža Mikałaj Statkievič. Palityk kaža, što jahonuju kandydaturu pakul nichto nie vyłučaŭ.
U Statkieviča na hety momant nie źniataja sudzimaść za Płošču-2010.
«Ad 2015 hoda maju sudzimaść na vosiem hadoŭ. Ale pavodle Kanstytucyi sudzimaść nie źjaŭlajecca pieraškodaj dla ŭdziełu ŭ vybarach, tolki ŭ Vybarčym kodeksie jość takija abmiežavańni», — daje svaju traktoŭku zakanadaŭstva palityk.
Statkievič kaža, što nie nazyvaje praces «vybarami», a tolki «vybarčaj kampanijaj». Na jahonuju dumku, u 2015 nie było alternatyŭnych kandydataŭ, była tolki «fejkavaja alternatyva».
«Na hety momant isnuje patencyjał palityčnaha pratestu (da 5%), sacyjalnaha (da 10%) i patryjatyčnaha supracivu (da 15%). Usio heta blizka da nula, ale patencyjał jość. I naša meta — abjadnać hetyja patencyjały», — raskazvaje Mikałaj Statkievič.
Pa jahonych słovach, na vybary treba iści z łozunham «uładu — narodu».
«My chočam mirnych pieramienaŭ, kab viarnuć vybarnaść, kab viarnuć ludziam mahčymaść na niešta ŭpłyvać. My chočam danieści na Uschod, što my nie źbirajemsia adrazu ŭstupać u NATO ci rabić niešta padobnaje. Demakratyčnaja Biełaruś budzie nadziejnym partnioram dla ŭsich susiedziaŭ. Hałoŭnaje — viarnuć svabodu», — padsumoŭvaje palityk.