Paśla praciahłaj paŭzy, jakaja zaciahnułasia z červienia, sud Centralnaha rajona Minska adnaviŭ razhlad spravy pavodle pazovu Uładzimira Japryncava da Juryja Čyža i siońnia ž vynies rašeńnie ab zadavalnieńni pazovu na 1960 rubloŭ. Z ulikam dziaržaŭnaj pošliny i kampiensacyi jurydyčnych vydatkaŭ Čyž vinien Japryncavu 3208 rubloŭ, paviedamlaje Tut.by.
Raniej sud dvojčy davaŭ bakam čas na prymireńnie, adbylisia sustrečy jurystaŭ Čyža z Uładzimiram Japryncavym, a pradstaŭnikoŭ apošniaha — z Čyžom. «Dalejšyja pieramovy niemetazhodnyja. Na ŭsie našy prapanovy Juryj Alaksandravič (Čyž — Zaŭv. Tut.by) adkazvaŭ prapanovami, jakija nie mahli zacikavić», — kanstatavała pradstaŭnik Japryncava.
Advakat Čyža Ivan Dudaraŭ rastłumačyŭ, što pradstaŭniki byłych partnioraŭ pa biźniesie sprabavali nie prosta damovicca pa isku, ale ŭrehulavać usiu situacyju z aktyvami, častka ź jakich pierapisana na zacikaŭlenych asob. «My z kalehami sprabavali vyrašyć pytańnie kompleksna. Pakul nie zmahli», — pryznaŭ pradstaŭnik adkazčyka.
Nahadajem, u pazovie, padadzienym jurystami Uładzimira Japryncava da byłoha partniora Juryja Čyža, havorka idzie pra hrošy za pradadzienyja akcyi łahistyčnaj kampanii ZAT «Askarhaterminał». Ździełka pa prodažy doli ŭ kampanii, jakoj vałodali Uładzimir Japryncaŭ (60%) i Śviatłana Čyž (40%), žonka Juryja Čyža, byŭ ździejśnieny 11 žniŭnia 2015 hoda, u dzień zatrymańnia Japryncava. Hrošy na rachunak Japryncava pastupili niekalkimi płaciažami, u ahulnaj sumie krychu bolš za 100 tysiač dołaraŭ u ekvivalencie. U momant zaličeńnia hrošaj na rachunak jon užo byŭ u SIZA, i ŭsia majomaść i rachunki byli aryštavanyja, ale hrošy byli źniatyja.
