6 śniežnia kataliki abodvuch abradaŭ ušanoŭvajuć pamiać śviatoha Mikałaja, biskupa Mirlikijskaha. Heta adzin z najbolš šanavanych chryścijanskich śviatych, ikona jakoha jość praktyčna ŭ kožnaj carkvie i ŭ mnohich siemjach.
Pra žyćcio śviatoha Mikałaja viadoma niašmat. Znajem, što śviaty Mikałaj doŭhija hady byŭ biskupam u Mirach, pravincyja Likija, u Małoj Azii. Braŭ udzieł u Pieršym Suśvietnym Sabory (325 h.) u Nikiei. Pamior kala 345 hoda. Usio svajo žyćcio pryśviaciŭ spravie miłasernaści dla dušy i cieła. Tajamnica jahonaha vialikaha kultu siarod chryścijan u tym, što jon dla ŭsich staŭ symbalem achviarnaj lubvi da bližniaha i spačuvalnaj miłasernaści. Paśla śmierci Boh prasłaviŭ jaho vyklučnym daram rableńnia cudaŭ, i tamu heta śviatoha vieličajuć Cudatvorcam.
Kult śviatoha Mikałaja pačynaje pašyracca z chryścijanskaha Uschodu z taho času, jak impieratar Justynijan I u siaredzinie VI stahodździa pabudavaŭ u jahony honar carkvu ŭ Kanstantynopali. Ź ICH stahodździa śviata śviatoha Mikałaja jość užo va ŭsich hreckich miesiacasłovach. Razam z chryścijanskaj vieraj kult śviatoha Mikałaja pryjšoŭ i na biełaruskija ziemli. Siońnia ŭ katalikoŭ bizantyjskaha abradu śviaty Mikałaj asabliva paminajecca ŭ malitvach nia tolki 6 śniežnia i 9 traŭnia (śviata pieraniasieńnia jahonych moščaŭ ŭ italjanski horad Bary), jamu pryśviečany taksama kožny čaćvier va ŭschodnim bohasłužbovym cykle.
U mienskaj hreka‑katalickaj parafii śviatoha Mikałaja śviatočnaja liturhija pačniecca ŭ subotu a 17‑j hadzinie ŭ kaściole Śv. Jana Chryściciela ŭ Sierabrancy (vuł. Plachanava). Razam ź viernikami hetaj parafii buduć malicca śviatary i vierniki troch inšych mienskich parafijaŭ katalikoŭ uschodniaha abradu. A
ŭ niadzielu a 10-j hadzinie ŭ hreka‑katalickim dušpastyrskim centry na Ardžanikidzie, 6 (st. metro «Aŭtazavodzkaja») budzie słužycca Boskaja liturhija dla dziaciej. Čakajecca, što paśla jaje zakančeńnia dzietak naviedaje sam śviaty Mikoła z pačastunkami…
