Zychodziačy z apublikavanaj infarmacyi, sprava śpiarša nie zdajecca nadta istotnaj.
21 vieraśnia byŭ aryštavany razam z žonkaj Hierman Sim, siaredni pa ranhu cyvilny čynoŭnik Ministerstva abarony Estonii.Jon abvinavačany ŭ špijanažy na karyść nienazvanaj zamiežnaj dziaržavy. Ni ad Sima, ni ad estonskich aficyjnych uładaŭ kamentaraŭ nakont aryštu nie prahučała.
Niekatoryja padrabiaznaści spravy ździŭlajuć. Na momant aryštu Hierman Sim užo byŭ adsunuty ad važnych spraŭ, ale
jaho papiaredniaja pasada mieła zvyšdalikatny charaktar: jon stvaryŭ systemu karystańnia ŭsioj sakretnaj infarmacyjaj — uklučajučy zusim sakretnyja dakumenty partneraŭ pa NATO — i kiravaŭ joj.Jon adkazvaŭ za nadańnie dostupu da režymaŭ sakretnaści estonskim čynoŭnikam u minabarony, orhanach biaśpieki i vyviedcy. Zamiežnik, abaznany ŭ hetaj spravie, kaža pra «patencyjny eŭrapiejski adpaviednik Ołdryča Ejmza» (kolišniaha hałoŭnaha rasiejskaha špieha ŭ Amerycy, jaki hadami ŭznačalvaŭ departament kontravyviedki CRU i zaraz adsiedžvaje pažyćciovy turemny termin).
Estonskaja sprava moža stać samym surjoznym pravałam NATO ŭ sfery biaśpieki za mnohija hady.
Jašče bolš intryhuje tajamničaje źniknieńnie ŭ momant aryštu Sima jahonaha suviaźnika — nibyta hišpanca, jaki pracuje ŭ Italii.Miarkujecca, što hety čałaviek byŭ «nielehałam» — rasiejskim vižam, infiltravanym u Eŭropu praz Łacinskuju Ameryku šlacham vykarystańnia staranna raspracavanaj padroblenych dakumentaŭ i identyčnaści i zdatnym, nie vyklikajučy padozrańniaŭ, dziejničać va ŭsim Eŭraźviazie. Hetkija «nielehały» źjaŭlajucca samym vytančanym instrumentam u arsenale vyviedki, bo ich falšyvyja identyčnaści składana i niatanna raspracavać, i jany zazvyčaj pracujuć tolki z adnoj krynicaj. Ale zdajecca, što ŭ vyniku prajaŭlenaha nieprafesijanalizmu rasiejskaj słužby vonkavaj vyviedki (SVR) hety samy hišpanski hramadzianin, aprača Sima, kantaktavaŭ jašče z adnoj vysokapastaŭlenaj krynicaj u inšaj krainie NATO dyj zaśviaciŭsia pry sprobie jaje zaverbavać. Verbavanaja asoba paviedamiła pra kantakt, zapuściŭšy ŭ dziejańnie mechanizm śledztva, jaki pryvioŭ da aryštu Hiermana Sima.
Zaraz ažyćciaŭlajecca vielizarnaja aperacyja pa abmiežavańni maštabaŭ škody, u ramkach jakoj vyśviatlajecca, što viedaŭ ci pra što moh sprabavać atrymać infarmacyju Sim. Pierahladajucca dopuski da režymaŭ sakretnaści i źviazanyja z tym pieramiaščeńni persanału. Supracoŭniki orhanaŭ biaśpieki va ŭsioj Eŭropie zaniatyja pošukami śladoŭ apošnich pieramiaščeńniaŭ hišpanca, kab takim čynam znajści inšyja prajavy padpolnaj dziejnaści. Jany taksama adsočvajuć śled dakumentaŭ, jakija dazvolili jamu zdabyć takuju pierakanaŭčuju identyčnaść hramadzianina EZ.
Hetaja sprava ŭźniała mnostva inšych pytańniaŭ. Rasiejskija ŚMI kpiać z bałtyjskich dziaržaŭ, jakija, maŭlaŭ, nia tolki lokai Zachadu, ale da taho ž i niekampetentnyja partnery. Ale ŭ supolnaści sakretnych słužbaŭ niama takoj dumki pra nienadziejnaść novych čalcoŭ NATO, nakštałt Estonii. Naadvarot,
estonskaja vyviedka i słužba biaśpieki karystajucca dobraj słavaj, jakaja rychtyk i robić ich takoj prynadnaj mišeńniu dla zamiežnych špijonaŭ. Akurat jakasnaja kontravyviednaja rabota stała pryčynaj aryštu.A ŭ bolšaści krainaŭ NATO, zaznačaje daśviedčany specyjalist, takija skandały zazvyčaj hłušacca i nia robiać takoha šumu.
