Pryčynaj uciečki kisłarodu na Mižnarodnaj kaśmičnaj stancyi ŭ kancy žniŭnia stała raskolina ŭ korpusie prystykavanaha da stancyi karabla «Sajuz MS-09», jakaja ŭtvaryłasia z-za vytvorčaha braku.
Pra heta RIA Naviny paviedamiła krynica ŭ rakietna-kaśmičnaj halinie. Pavodle jaje słoŭ, raskolina «ŭźnikła jašče na Ziamli» i ŭžo viadoma, chto niasie za heta adkaznaść. Supracoŭnik, jaki dapuściŭ źjaŭleńnie raskoliny, vierahodna, zaŭvažyŭ jaje i zakleiŭ śpiecyjalnym klejem, tamu jaje nie zaŭvažyli pry praviercy karabla na hiermietyčnaść pierad zapuskam, skazała inšaja krynica ahienctva.
U pieršyja dva miesiacy raskolina nie prajaŭlałasia, ale potym klej padsoch, vykryšyŭsia i adkryŭ adtulinu, patłumačyła jana.
Uciečku pavietra ekipaž MKS zaŭvažyŭ u noč na 27 žniŭnia. Na nastupny dzień rasijskija kasmanaŭty zamazali raskolinu hiermietykam.
Paviedamlałasia, što raskolina nie pavinna stvaryć pahrozu žyćciu ludziej pry viartańni na Ziamlu, bo jana nie ŭ spuščalnym aparacie, a ŭ bytavym adsieku.