Takija źviestki apytańnia hramadskaj dumki apublikavaŭ sacyjałahičny centr TAA «Lusterka‑Infa» (zerkalo‑info.com).
Jak paviedamlaje «Lusterka‑Infa», 24—30 kastryčnika 2008 hoda sacyjałahičnym centram u miežach respublikanskaha sacyjałahičnaha daśledavańnia ažyćcioŭleny zandaž hramadskaj dumki žycharoŭ stalicy. Pa praparcyjanalna‑kvotnaj vybarcy apytanyja bolš za 500 respandentaŭ va ŭzroście 14 hadoŭ i starejšyja. Padkantrolnyja paramietry: poł, uzrost, adukacyja. Pamyłka reprezientatyŭnaści — u miežach 1%.
Respandentam prapanoŭvałasia adkazać na pytańnie: «U niekatorych krainach, naprykład u Kitai, Iranie i Nihieryi, abvinavačańnie ŭ karupcyi maje vynikam žorstkaje pakarańnie — čaściej za ŭsio śmierć.Prymianiajucca i inšyja vidy pakarańniaŭ, takija jak adsiačeńnie častak cieła. Publičnyja pakarańni demanstrujucca pa telebačańni. Jak Vy ličycie, u Biełarusi takaja miera mahła b sadziejničać pieraadoleńniu karupcyi?»
«Biezumoŭna tak» i «chutčej tak» adkazali 21,6 i 27,0% respandentaŭ adpaviedna, što ŭ sumie składaje 48,6%. «Chutčej nie» i «biezumoŭna nie» — 21,4 i 19,2% adpaviedna, što składaje 40,6%.
Pry hetym bolšaść minčan nie padtrymlivajuć ideju publičnaha pakarańnia abvinavačanych u karupcyi.Biezumoŭna padtrymali b hetuju ideju tolki 7,4%, a chutčej padtrymali b — 18,4% apytanych. Chutčej nie padtrymali b hetuju ideju 28,3%, a biezumoŭna nie padtrymali b — 36,4% respandentaŭ.
Kali b minčanie vałodali źviestkami ab karupcyi, u pieršuju čarhu jany b prainfarmavali pravaachoŭnyja orhany (33,2%), srodki masavaj infarmacyi (14,0%), pravaabarončyja i inšyja hramadskija arhanizacyi (9,5%). Pa 7,6% u hetym pytańni nabrali miascovyja orhany ŭłady, asabista prezident i adkaz «nie staŭ by paviedamlać ni pry jakich umovach».
Kiraŭnik sacyjałahičnaha centra TAA «Lusterka‑Infa» Leanid Michiejčykaŭ u hutarcy z karespandentam BiełaPAN zaznačyŭ, što «ŭ minčan zaŭsiody svojeasablivy padychod». «Z adnaho boku, ludzi vystupajuć za ekstremalnyja i radykalnyja dziejańni ŭ baraćbie z karupcyjaj. Ale kali heta tyčycca niepasredna ich i ich dziaciej — entuzijazm značna źmianšajecca», — skazaŭ Ł.Michiejčykaŭ.
