Alaksandr Łukašenka ličyć, što ŭ Biełarusi i Livii jość mahčymaści dla raźvićcia dvuchbakovych adnosinaŭ.
Pra heta prezident zajaviŭ 2 listapada na sustrečy z kiraŭnikom Livijskaj Arabskaj Džamachiryi Muamaram Kadafi, jakaja adbyłasia ŭ zale aficyjnych delehacyj Nacyjanalnaha aeraporta "Minsk", paviedamlaje dziaržaŭnaje ahienctva BiełTA.
Heta pieršy vizit u Biełaruś livijskaha lidera. Biełaruski prezident naviedvaŭ Liviju z aficyjnym vizitam u 2000 hodzie.
Siońnia A.Łukašenka paćvierdziŭ, što ŭsie damoŭlenaści ź Livijaj vaśmihadovaj daŭniny zastajucca ŭ sile.
"Vielmi rady tamu, što adbyvajecca ciapier u vas u krainie. Livija — kraina, jakaja intensiŭna raźvivajecca, i my ŭsialak žadajem vašamu narodu dabra", — cytuje BiełTA prezidenta Biełarusi.
U adkaz na heta M.Kadafi zajaviŭ, što ŭ Livii sočać za padziejami ŭ Biełarusi.
"My cenim vašu pryncypovuju pazicyju, stojkaść. My zaŭvažyli značny praryŭ, toje, jakich vialikich pośpiechaŭ u svaim raźvićci dasiahnuła za hety čas Biełaruś", — skazaŭ livijski lider.
M.Kadafi paćvierdziŭ namier raźvivać dalejšaje supracoŭnictva ź Biełaruśsiu, zaznačyŭšy, što jon zadavoleny tym, jak raźvivajucca adnosiny Livii z Rasijaj i inšymi krainami SND. "Raźvićcio vašaha rehijonu važnaje dla padtrymańnia bałansu ŭ śviecie", — skazaŭ M.Kadafi.
Pavodle infarmacyi pres-słužby prezidenta Biełarusi, 3 listapada A.Łukašenka i M.Kadafi praviaduć pieramovy ŭ vuzkim i pašyranym składzie. Pavodle vynikaŭ sustreč płanujecca padpisańnie šerahu dvuchbakovych dakumientaŭ, u tym liku Kanviencyi ab paźbiahańni dvajnoha padatkaabkładańnia i papiaredžańni ŭchileńnia ad upłaty padatkaŭ u dačynieńni padatkaŭ na dachody i majomaść, Pratakoła ab supracoŭnictvie pamiž Ministerstvam justycyi Biełarusi i Hałoŭnym narodnym kamitetam justycyi Livii, Miemaranduma ab uzajemarazumieńni pamiž Dziaržkamitetam pa standartyzacyi Biełarusi i Nacyjanalnym centram Livii pa standartyzacyi i mietrałohii ab supracoŭnictvie ŭ halinie standartyzacyi, mietrałohii i acency adpaviednaści, a taksama Pahadnieńnia ab supracoŭnictvie pamiž Nacyjanalnaj dziaržteleradyjokampanijaj Biełarusi i Hienieralnaj asacyjacyjaj teleradyjoviaščańnia Livii.
