Andrejčanka — novy śpikier pałaty pradstaŭnikoŭ 2

Hałoŭnym pytańniem pieršaha pracoŭnaha dnia pieršaj sesija pałaty pradstaŭnikoŭ čaćviortaha sklikańnia było abrańnie śpikiera, jahonaha namieśnika, a taksama stvareńnie stałych kamisij.

Na pasadu staršyni byŭ prapanavany tolki Ŭładzimier Andrejčanka. U vyniku za jahonuju kandydaturu prahałasavała 107 deputataŭ, suprać — 1, jašče adzin biuleteń pryznany niesapraŭdnym.

Uładzimier Andrejčanka naradziŭsia ŭ 1949 hodzie ŭ vioscy Marjanava Loźnienskaha rajonu. Skončyŭ Łužaśnianski saŭhas‑technikum, sielskahaspadarčy instytut u Vialikich Łukach (Rasieja), Mienskuju vyšejšuju partyjnuju škołu. Pracoŭnuju dziejnaść pačynaŭ ahranomam u Vierchniadźvinskim rajonie. Na praciahu siemnaccaci hadoŭ pracavaŭ u rodnym Loźnienskim rajonie: na partyjnych pasadach, staršyniom kałhasu imia Danukałava, staršyniom rajvykankamu. Byŭ deputatam Viarchoŭnaha savietu XII sklikańnia. Uznačalvaŭ kamitet pa sielskaj haspadarcy i charčavańniu. U listapadzie 1994 hodu pryznačany staršyniom Viciebskaha abłvykankamu. Słužyŭ u vojsku. Žanaty, maje dvuch dziaciej.

Uładzimier Andrejčanka — staražył uładnaj vertykali. Na svajoj pasadzie jon adpracavaŭ biez małoha 14 hadoŭ, nichto ź jahonych kalehaŭ tak doŭha u «hubernatarskim» kreśle nie zatrymlivaŭsia. Mnohija ličać, što pryznačeńnie Andrejčanki ŭ svoj čas stała mahčyma dziakujučy tahačasnamu kiraŭniku Administracyi prezydenta Leanidu Sinicynu.

Z hałoŭnych rysaŭ Andrejčanki adznačajuć niekanfliktaść, dobraje ŭmieńnie vykonvać zahady. Čynoŭnik nikoli nie imknuŭsia na vidnyja roli. U viciebskim abłvykankamie zaŭsiody była nievialikaja ludzkaja ciakučka, Andrejčanka daviaraje tolki pravieranym kadram.

Za taki praciahły termin čutki pra zvalnieńnie staršyni abłvykankamu chadzili nieadnarazova. Apošnija papaŭźli letaś, paśla aryštu bandy Rymasa.

Na adnoj z naradaŭ Łukašenka prosta skazaŭ: «Stamiŭsia hubernatar». Prosta adpraŭlać na pensiju takoha pavažanaha čałavieka paličyli niemetazhodnym. Darečy, razam z Andrejčankam u pałatu trapiŭ i jahony namieśnik Piotr Južyk. Novaje kiraŭnictva Viciebščyny jašče nie pryznačanaje.

Namieśnikam Andrejčanki abrany 53-hadovy Valery Ivanoŭ, jaki raniej uznačalvaŭ Škłoŭski rajvykankam. Za jaho prahałasavała 105 deputataŭ, suprać - 4.

Źmicier Pankaviec

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH