Iłan Mask. Fota wikimedia.org
U noč na 6 maja hiendyrektar Tesla i SpaceX Iłan Mask zajaviŭ u svaim Tvitary, što źbirajecca adkryć kandytarskuju kampaniju. Jon adznačyŭ, što heta budzie nievierahodna i što jon «supier-supier surjozna».
«Ja adkryvaju kandytarskuju kampaniju i heta budzie nievierahodna. Ja supier-supier surjozna».
Ale padobna, što heta byŭ tolki čarhovy raŭnd jaho zavočnaj sprečki ź inviestaram Uorrenam Bafietam, piša TJ.
«Dobra, dobra, prosta dla ŭjaŭleńnia: jakija cukierki vy chočacie? Kryptacukierki».
Mask i Bafiet spračalisia pra madel «ekanamičnych rvoŭ», prydumanych inviestaram. Dziakujučy doŭhaterminovaj ekanamičnaj pieravazie jana dazvalaje atrymlivać prybytak bolšy, čym u inšych hulcoŭ na rynku.
Kiraŭnik Tesla padčas kanfierenc-razmovy ź inviestarami zajaviŭ, što takaja stratehija prymalnaja tolki ŭ niekatoraj stupieni, pakolki jana nie dapamoža suprać surjoznych napadaŭ kankurentaŭ. Pavodle jaho słoŭ, sapraŭdy važnyja inavacyi.
Bafiet adkazaŭ Masku padčas pres-kanfierencyi svajho fondu Berkshire Hathaway. Jon zajaviŭ, što ŭ apošni čas ekanamičnyja ravy sapraŭdy stali mienš efiektyŭnyja dziakujučy technałahičnym praryvam, ale ŭsio jašče važnyja i «idealna pracujuć» dla niekatorych kampanij.
U jakaści prykładu takoj kampanii inviestar pryvioŭ See's Candies, jakoj jon vałodaje praz fond Berkshire Hathaway. Pa słovach Bafieta, u kandytarskaj kampanii vielmi šyroki ekanamičny roŭ praz łajalnuju spažyvieckuju bazu i tamu kankurenty nie zdolnyja zajmieć jaje dolu na rynku. Akramia taho, jon aścierahaŭ Maska ad kankurencyi ź im u hetaj halinie.
«Viadoma vy pavinny pracavać nad palapšeńniem svajho rova i nad jaho abaronaj uvieś čas. I Iłan sapraŭdy moža pieraviarnuć usio dahary nahami ŭ niekatorych śfierach. Ale ja nie dumaju, što jon chacieŭ by kankuravać z nami ŭ vytvorčaści cukierak», — skazaŭ Uoren Bafiet.
Miarkujučy pa ŭsim, tvity Maska — heta ŭsiaho tolki sproba zatrolić Bafieta. Adnak toj choć i zarehistravany ŭ tvitary, ale apublikavaŭ usiaho dzieviać zapisaŭ, apošni ź jakich u 2016-m hodzie.
«Paśla hetaha ja pabuduju roŭ i napoŭniu jaho cukierkami. Uoren Bafiet nie zmoža supraciŭlacca inviestavańniu ŭ heta! Heta kryptanit dla Berkshire Hathaway…»
Na žartoŭnaść tvitaŭ namiakaje i toje, što razmovu pra kandytarskuju fabryku Mask pačaŭ sa spasyłki na adrezak ź filma «Troli». A ŭ kancy pradprymalnik apublikavaŭ spasyłku na materyjał vydańnia Fortune, dzie napisana, što jon zatroliŭ Bafieta.
