Nie paśpieli absmaktać padrabiaznaści pieršaha tura čempijanatu Biełarusi pa futbole, jak užo 5 krasavika startuje tur druhi. Nadvorje šepča, tamu i samim futbalistam budzie bolš pryjemna hulać, i hledačam sačyć za matčami. Cikava, chto z favarytaŭ pieršym pakaža jakasnuju i zabiŭnuju hulniu? My praciahvajem nazirać za čempijanatam Biełarusi razam z Bukmiekierskaj kantoraj Marafon.
- «Słuck» — «Nioman»
- 05.04 / 17:30. Babrujsk, stadyjon imia A.Prakapienki
- Kaeficyjenty: «Słuck» (pieramoha) — 2.75, ničyja — 2.97, «Nioman» (pieramoha) — 2.75
Fota Voli Trafimovič.
Chatni stadyjon Słucka ŭsio jašče nie hatovy prymać matčy čempijanata, tamu «cukrovamu» kalektyvu kryšačku daviadziecca pabadziacca pa inšych haradach. Cikava, što pieršy matč, chacia jon i byŭ haściavym, słuččakam davodziłasia hulać taksama ŭ Babrujsku. Sioleta «Słuck» adznačaje svajo 20-hodździe, tamu matyvacyja kamandy pakazać dobry vynik pavinna zaškalvać. Ale na hety momant kamandzie Vitala Paŭłava dobra było chacia b zabić pieršy hoł u čempijanacie.
«Nioman» jaho ŭžo zabiŭ, pryčym jak dramatyčna! Užo ŭ kampiensavany arbitram čas Viačasłaŭ Hleb vyrvaŭ ničyju ŭ hulni z «Viciebskam». U haradziencaŭ sabrałasia vielmi ołdskulnaja banda. Heta ŭžo i zhadany Słava Hleb, i Mikałaj Januš, i Leanid Koviel, i Valeryj Žukoŭski. Charaktar u kamandy, biezumoŭna, jość. Ale hałoŭnymi ńjuśmiejkierami pieršaha tura stali, biez sumnievaŭ, fanaty «Niomana», jaki vyviesili na trybunach banier da 100-hodździa BNR.
Prahnoz «NN»: totał mienšy 2,5.
- «Dynama» (Brest) — «Pramień»
- 05.04 / 19:30. Brest, stadyjon «Junactva»
- Kaeficyjenty: «Dynama» (Brest) (pieramoha) — 1.31, ničyja — 5.00, «Pramień» (pieramoha) — 9.90
Brescki intarnacyjanał byŭ bližejšy da pieramohi ŭ startavym tury nad «Šachcioram», ale Paŭłu Savickamu ŭ druhim tajmie nie chapiła dakładnaści. Ale heta ŭsio ž była hulnia ź jašče adnym favarytam, tamu ničyju, chaj i nie duža pryjemnuju, možna ličyć vynikam zdavalniajučym.
Ciapier ža hublać ački ŭ matč z «Pramieniem» prosta niedapuščalna. Pytańnie, chto pačnie zabivać u «Dynama»? Marnatraŭny syn Mileŭski, hanski haleador Famieje ci naš miascovy Niachajčyk? «Dynama» taksama prymie supiernika nie na asnoŭnym stadyjonie. Darečy, pryniataje rašeńnie, što kłub budzie budavać ułasnuju arenu.
Što tyčycca «Pramienia», to kamanda nabrała pieršyja ŭ historyi ački ŭ vyšejšaj lizie. Mohuć być saboj zadavolenyja. Zdajecca, kab jašče kryšačku nacisnuli, to mahli b uvohule abyhrać «Minsk», ale matč tak i skončyŭsia samym papularnym likam startavaha tura — 0:0.
Prahnoz «NN»: Pieramoha «Dynama» z roźnicaj bolšaj u 1 hoł.
- «Minsk» — BATE
- 06.04 / 17:00. Minsk, stadyjon FK «Minsk»
- Kaeficyjenty: «Minsk» (pieramoha) — 10.50, ničyja — 5.00, BATE (pieramoha) — 1.30
Vital Radzivonaŭ raźvitvajecca z karjeraj hulca. Fota sports.tut.by.
«Minsk» hulaŭ samy pieršy matč hetaha čempijanata. Nie pieramoh, nie prajhraŭ, nie prapuściŭ, nie zabiŭ. Kali kazać u cełym, to ŭvohule ničym nie adznačyŭsia. Maładoj kamandzie budzie niaprosta zastacca ŭ «vyšcy», zmahańnie sa «Smalavičami», «Tarpieda», «Pramieniem» budzie nie na žyćcio, a na śmierć. Pakul ža realny trenier «minčukoŭ» Alaksandr Łuchvič nie moža aficyjna zajmać hetuju pasadu, bo nie maje licenzii, a na pres-kanfierencyi chodzić impazantny Uładzimir Kurnieŭ.
Zaŭziatary nie byli zadavolenyja pieramohaj BATE ŭ pieršym tury. Ledź-ledź ź minimalnym likam atrymałasia adužać «Smalavičy». Dla barysaŭcaŭ toj viečar zapomnicca jašče tym, što z karjeraj futbalista raźvitaŭsia lehiendarny bambardzir Vital Radzivonaŭ, jaki staŭ spartyŭnym dyrektaram kłuba. Futbołku z numaram Radzivonava ŭźniali pad zvodam «Barysaŭ-Areny». Pieršym takoha honaru zasłužyŭ Dźmitryj Lichtarovič. Admietna, što majka Lichtaroviča padpisanaja pa-rusku, a ŭ Radzivonava ŭžo na biełaruskaj movie.
Prahnoz «NN»: BATE atrymaje pieramohu.
- «Tarpieda-BiełAZ» — «Smalavičy»
- 06.04 / 19:00. Žodzina, stadyjon «Tarpieda»
- Kaeficyjenty: «Tarpieda-BiełAZ» (pieramoha) — 1.46, ničyja — 3.95, «Smalavičy» (pieramoha) — 7.90
«Tarpieda-BiełAZ» razam ź minskim «Dynama» vydali samy vidoviščny matč pieršaha tura. Hości z Žodzina hladzielisia zusim nie horš za svaich bolš tytułavanych supiernikaŭ, ale pieramohu tak i nie zdabyli. Žodzincy stali pieršymi ŭ «vyšcy», chto staŭ nanosić numary futbalistaŭ nie tolki zzadu, ale i śpieradu na majkach. Zdajecca, drobiaź, ale robić bolš pryjemnym prahlad matča. «Tarpieda» realna ŭmacavałasia ŭ hetym siezonie, tamu ad matča sa «Smalavičami» čakajecca tolki pieramoha.
«Smalavičy» mohuć być saboj zadavolenyja. Prajhrać minimalna BATE ŭ haściach darahoha varta! Hałoŭny trienier «Smalavič» jašče pažartavaŭ, što kłub tolki pajšoŭ u škołu, a jaho adrazu adpravili na ekzamien. Z žodzincami budzie absalutna nie lahčej. Derbi Smalavickaha rajona abiacaje być haračym.
Prahnoz «NN»: Pieramoha «Tarpieda».
- «Dniapro» — «Homiel»
- 06.04 / 20:45. Mahiloŭ, stadyjon «Spartak»
- Kaeficyjenty: «Dniapro» (pieramoha) — 2.26, ničyja — 3.10, «Homiel» (pieramoha) — 3.34
«Dniapro» paśla pieršaha tura ŭ vielmi ŭźniosłym nastroi. Kamanda sastupała ŭ Haradziei, ale zdabyła takija važnyja na starcie try punkty. Asabliva zapomniŭsia hoł ukrainskaha lehijaniera Rudyki, jaki možna śmieła nazyvać samym pryhožym u pieršym tury. Ad «Dniapra» mała chto čahości čakaje, a kamanda demanstruje, što zdolnaja stać adnoj ź siensacyj pieršynstva.
Cikava, što fanaty «Dniapra» i «Homiela» zaŭsiody byli pamiž saboj u siabroŭskich adnosinach. Navat byvała, što jany znachodzilisia na adnym siektary. Cikava, ci budzie takoje ž braterstva ŭ piatnicu? «Homiel» ža vidavočna budzie imknucca da pieršaj u siezonie pieramohi.
Prahnoz «NN»: «Dniapro» nie prajhraje.
- «Tarpieda» — «Haradzieja»
- 07.04 / 12:00. Minsk, stadyjon FK «Minsk»
- Kaeficyjenty: «Tarpieda» (pieramoha) — 3.54, ničyja — 3.02, Haradzieja (pieramoha) — 2.22
Viartańnie lehiendarnaha minskaha kłuba ŭ vyšejšuju lihu było padobna da zachaplalnaha błakbastera. «Isłač» była značna macniejšaj za «Tarpieda» — heta treba pryznać. Ale svaju pieravahu zmahło zafiksavać tolki ŭ adnym miačy. «Čorny-biełyja» adyhralisia ŭžo na siomaj kampiensavanaj arbitram chvilinie. Ź pienalci adznačyŭsia Vadzim Dziemidovič. Adrazu ž prahučaŭ finalny śvistok i supracoŭniki kłuba, a taksama častka zaŭzatiaraŭ rynułasia na pole. Debiut jaŭna ŭdaŭsia.
«Haradzieja» za čas znachodžańnia ŭ vyšcy pierastała ŭsprymacca jak čužarodny elemient. U miastečku sapraŭdy lubiać futboł. Na matč pieršaha tura jany zaprasili srebranaha pryziora marafona «Dakar» Siarhieja Viazoviča. U Haradziei mohuć i ŭmiejuć stvarać z hulni śviata. Škada, što sama kamanda krychu rasčaravała dy sastupiła ŭ dramatyčnym matčy «Dniapru».
Prahnoz «NN»: ničyja.
- «Viciebsk» — «Šachcior»
- 07.04 / 16:00. Viciebsk, CSK «Viciebski»
- Kaeficyjenty: «Viciebsk» (pieramoha) — 3.80, ničyja — 3.40, «Šachcior» (pieramoha) — 1.97
Abodva kalektyvy čakali ad starta pieršynstva bolšaha, abodva zadavolilisia ničyjnymi vynikami. Chacia ci zadavolilisia? Trenier viciablan Siarhiej Jasinski na paślamatčavaj pres-kanfierencyi skazaŭ, što ździviŭsia b, kab da hulni jamu skazali, što rasstroicca ad ničyi z «Niomanam». Ale hublać pieramohu ŭ kampiensavany čas zaŭsiody niepryjemna. Ciapier «Viciebsku» treba dakazvać svoj kłas z kudy bolš majstravitym supiernikam.
Nichto nie viedaje, čaho čakać «Šachciora» ŭ hetym siezonie. Šarmu zahadkavaści dadaje tajamničy polski trenier Zub. Voś i hadajuć našy ekśpierty, ci sapraŭdy jon macniejšy za miascovych śpiacoŭ, ci prosta bałaŭ jon nabiraje za svaju inšaziemnaść. Mnohija ŭvohule nie ličać, što «Šachcior» sioleta zmoža zavajavać miedali. Ciapier čarha za salihorcami: ci paćvierdzić heta, ci abvierhnuć.
Prahnoz «NN»: Pieramoha «Šachciora».
- «Dynama» (Minsk) — «Isłač»
- 07.04 / 15:00. Minsk, stadyjon «Traktar»
- Kaeficyjenty: «Dynama» (Minsk) (pieramoha) — 1.36, ničyja — 4.70, «Isłač» (pieramoha) — 8.60
Minskija dynamaŭcy radujucca pieramozie ŭ pieršym tury. Fota z supołki «Dynama» ŭ vk.com.
Centralnaja hulnia tura. Minskaje «Dynama» prademanstravała vielmi śpiełuju i jakasnuju hulniu ŭ pieršym tury, adoleŭšy «Tarpieda-BiełAZ». Ciapier im treba dakazvać, što heta nie było vypadkovaściu. Dumajecca, futbalistam «Dynama» zachočacca padnieści padarunak svajmu ŭłaśniku. Juryj Čyž na hetym tydni adznačyŭ svajo 55-hodździe. Tolki tryvožna, kab dynamaŭcy, jakija tak zachapilisia abmierkavańniem siezona minułaha, nie zabylisia, što startavaŭ užo novy čempijanat.
«Isłač» za čas znachodžańnia ŭ vyšejšaj lizie dobra tak abrasła miasam. Heta ŭžo kalektyŭ, ź jakim prychodzicca ličycca ŭsim. Letašniaje vyprabavańnie sa źniatymi ačkami stali dobrym instytutam dla futbalistaŭ ź Minskaj vobłaści. Tolki niešancavańniem možna rastłumačyć toje, što kamanda nie zdabyła try punkty ŭ pieršym tury. Cikava, ci zdolejuć ciapier isłačskija «vaŭki» pakusać «Dynama»?
Prahnoz «NN»: «Isłač» nie sastupić.
Sočym za čempijanatam Biełarusi razam z Bukmiekierskaj kantoraj Marafon!
