U Litvie zarehistravany hramadski ruch u abaronu represavanych u Biełarusi, paviedamiŭ BiełaPAN adzin ź jaho zasnavalnikaŭ prafiesar Juryj Bandažeŭski.
Pavodle jaho słoŭ, zasnavalnikami ruchu vystupili pradstaŭniki litoŭskaj hramadskaści, bujnyja pradprymalniki i jurysty.
Vučony ŭpeŭnieny, što takoje supracoŭnictva biełarusaŭ i litoŭcaŭ «daść plon». «My budziem dapamahać usim biełaruskim hramadzianam, chto zmahajecca za svaje pravy. Takaja dapamoha vielmi važnaja, bo ŭ Biełarusi niama efiektyŭnaha instrumienta abarony pravoŭ čałavieka», — skazaŭ Ju.Bandažeŭski. Pavodle jaho słoŭ, u chutkim časie zasnavalniki ruchu ŭstanoviać kantakty z aficyjnymi mižnarodnymi strukturami, kab mieć mahčymaść efiektyŭna dapamahać tym, chto maje patrebu ŭ abaronie.
«Reč u tym, što luboje ŭščamleńnie pravoŭ čałavieka źjaŭlajecca represijami, voś čamu my budziem akazvać lubuju, u tym liku maralnuju, materyjalnuju i jurydyčnuju, dapamohu tym, chto ŭ joj maje patrebu», — skazaŭ jon.
Vučony z Homiela doktar miedycynskich navuk Juryj Bandažeŭski, aŭtar daśledavańniaŭ ab upłyvie małych doz radyjacyi na arhanizm čałavieka, šeść hadoŭ pravioŭ u turmie za atrymańnie chabaru. Svaju vinu jon nie pryznaŭ, zajaviŭšy, što biełaruskija ŭłady takim čynam raspravilisia ź im za jaho navukovuju dziejnaść.