19 lutaha adbyŭsia sud nad naziralnikam Arciomam Skarabahatym. Minski rajonny sud aryštavaŭ jaho na 7 sutak nibyta za łajanku na vybarčym učastku №3 u Baraŭlanach i №2 pasiołku Lasny, jakija mieściacca ŭ adnym budynku ŭ miascovym Domie kultury ahraharadka Lasny.
Raniej «Naša niva» pisała, što pra zatrymańnie chłopca paviedamiŭ jaho brat:
«Arcioma pasadzili ŭ mašynu i jon paśpieŭ mnie patelefanavać. Skazaŭ, što nieviadomyja ŭ cyvilnym vyvieli jaho z budynka. Nie pradstaŭlalisia, dakumienty nie pakazvali, zapchnuli ŭ aŭtamabil. Bolš raspavieści nie paśpieŭ. Ciapier u Arcioma vyklučany telefon».
Kryścina Šabłoŭskaja, namieśnica staršyni kamisii na Baraŭlanskim učastku, skazała, što jana sama vyklikała milicyju — Skarabahaty nibyta pieraškadžaŭ kamisii pracavać.
«Parušaŭ pravaparadak, hučna razmaŭlaŭ, ustupaŭ u niecenzurnuju łajanku z naviednikami. My vymušanyja byli vyklikać orhany ŭnutranych spraŭ», — skazała Šabłoŭskaja.
Jana zapeŭniła: pryjechali ludzi ŭ formie, składali na naziralnika pratakoł. Dalej za losam Skarabahataha jana nie sačyła, ci vyvodzili jaho kudyści ludzi ŭ cyvilnym nie bačyła, bo «siońnia ž vybary, na ŭčastku šmat narodu».
Paźniej, stała viadoma, što Arcioma advieźli ŭ adździaleńnie milicyi ŭ ahraharadok Sienicu. Pa słovach svajakoŭ Skarabahataha, tam chłopca «pravieryli na psichatropnyja rečyvy, ničoha nie znajšli i skazali, što ŭ paniadziełak 19 lutaha buduć sudzić za łajanku matam».
Skarabahatyja — heta viadomaja šmatdzietnaja siamja. Jany biełaruskamoŭnyja, a pa vieravyznańni — pratestanty.
