U Aśviencimie asudzili ŭdzielnikaŭ mastackaha pierformansu kala bramy nacysckaha kancentracyjnaha łahiera.
Fota Uładzia Hrydzina
Adam Bialacki asudžany da 1 hoda 6 miesiacaŭ źniavoleńnia. Jaho pryznali vinavatym ŭ źniavazie miesca pamiaci i zabojstvie žyvioły. Jon taksama musić zapłacić štraf u pamiery 2000 złotych (kala 630 dalaraŭ ZŠA). Jamu zabaroniena mieć žyviołaŭ na praciahu 10 hadoŭ. Mikita Vaładźko asudžany da 1 hoda 2 miesiacaŭ źniavoleńnia. Jamu taksama zabaroniena mieć žyviołaŭ na praciahu 10 hadoŭ.
Paśla abviaščeńnia prysudu sudździa rajonnaha sudu Aśviencima jašče kala 30 chvilin tłumačyła svajo rašeńnie pa kožnym z abvinavačanych.
«Ludzi prychodziać tudy, kab apłakvać śmierć svaich blizkich, śmierć u strašnych mukach. I jość hrupa maładych ludziej, jakija chočuć samaśćvierdzicca… Jak možna pratestavać suprać hvałtu, užyvajučy hvałt? Heta supiarečyć usiamu… Adam Bialacki i Mikita Vaładźko, vy dastatkova maładyja ludzi, majecie krychu bolš za 20 hadoŭ. Ale vy viedajecie, što robicie. Ja chaču zadać vam pytańnie, na jakoje nie čakaju adkazu, — ci zrabili b vy toje samaje ŭ jakim-niebudź inšym miescy? Ci zrabili b heta ŭ miescy, dzie pachavanyja vašy prodki? Dumaju, što nie».
Rašeńnie prysudzić Bialackamu i Vaładźko terminy, amal udvaja mienšyja za tyja, jakich patrabavaŭ prakuror, jana patłumačyła maładościu abvinavačanych i tym, što jany ŭpieršyniu traplajuć za kraty.
Razam z tym sudździa adznačyła nieprymalnyja pavodziny Adama Bialackaha na pracesie i toje, što jon nanios jahniaci 15 udaraŭ — heta nijak nia śviedčyć pra žadańnie pazbavić jaho pakutaŭ, pra što Bialacki zajaŭlaŭ padčas razhladu spravy.
Na abviaščeńnie prysudu pryjšli tolki čaćviora z 12 abvinavačanych performeraŭ.
Adam Bialacki, fota Uładzia Hrydzina
U tym liku Adam Bialacki (jon adziny mieŭ dadzienaha dziaržavaj advakata) i Mikita Vaładźko. Bialacki paśla prysudu kateharyčna admoviŭsia razmaŭlać ź biełaruskimi ŚMI. Padčas ahučvańnia rašeńnia sudu jon uśmichaŭsia.
«Heta niejkaja hańba. Artystaŭ nielha karać za tvor mastactva, — skazaŭ Mikita Vaładźko Svabodzie adrazu paśla abviaščeńnia prysudu.
— Ničoha tam nie adbyłosia takoha, za što možna karać. Nichto nikoha nie abraziŭ. Usio, što jany kažuć, heta nie dakazana. Zabojstva žyvioły, tak. Ale heta žyvioła, jaje možna zabivać… Što ja budu zaraz rabić? Nia viedaju pakul. Advakata treba najmać, ja nie chaču ŭ turmu».
