U śviata Chrostu Pana ŭ tradycyjnaj pramovie padčas malitvy «Anioł Panski» papa Francišak daŭ viernikam «chatniaje zadańnie», paviedamlaje catholic.by.
Napačatku Śviaty Ajciec adznačyŭ, što śviata Chrostu Pana, jakoje zaviaršaje pieryjad Božaha Naradžeńnia, zaklikaje nas zadumacca nad našym chrostam. «Jezus pažadaŭ pryniać chrost, jaki abviaščaŭ i ŭdzialaŭ na Jardanie Jan Chryściciel». Jezus, «nie majučy hrachu, staŭ u čarhu razam z hrešnikami, źmiašaŭsia ź imi, kab być achryščanym u vodach raki. Kolki ž u Jezusa pakory! Robiačy heta, Jon pakazaŭ hatoŭnaść zanurycca ŭ raku čałaviectva, pryniać na siabie abmiežavańni i słabaści ludziej, padzialić ź imi žadańnie vyzvaleńnia i pieraadoleńnia ŭsiaho taho, što addalaje ad Boha i robić čužyncam u adnosinach da bratoŭ. Jak u Betlejemie, taksama i na bierazie Jardanu Boh strymlivaje abiacańnie pryniać na siabie ciažar čałaviečaha losu, i Jezus źjaŭlajecca datykalnym i kančatkovym znakam hetaha».
Śviaty Duch «ździajśniaje chrost Jezusa, a taksama naš chrost. Jon adkryvaje vočy našaha serca na praŭdu, na ŭsiu praŭdu. Jon vyvodzić našaje žyćcio na ściežku lubovi. Jon — heta dar, jaki Ajciec daŭ kožnamu z nas u dzień našaha chrostu. Jon, Duch, pieradaje nam łaskavaść Božaha prabačeńnia».
Papa padkreśliŭ, što śviata Chrostu Jezusa zaprašaje kožnaha chryścijanina ŭzhadać svoj ułasny chrost.
«Ja nie mahu zadać vam pytańnia, ci pamiatajecie vy dzień svajho chrostu, pakolki bolšaść z vas byli dziećmi, jak i ja; nas achryścili jašče ŭ malenstvie. Ale ja zadam vam inšaje pytańnie: vy viedajecie datu vašaha chrostu? Viedajecie, u jaki dzień vy byli achryščanyja? Niachaj kožny pra heta padumaje. I kali vy nie viedajecie abo zabylisia datu, to, viarnuŭšysia dadomu, zapytajciesia ŭ mamy, u babuli, u dziadzi, u cioci, u dziaduli, u chrosnaha, u chrosnaj, jaki heta byŭ dzień.
I hetuju datu my pavinny zaŭsiody trymać u pamiaci, pakolki heta — śviatočny dzień, heta dzień našaha pieršapačatkovaha aśviačeńnia; dzień, kali Ajciec daŭ nam Śviatoha Ducha, jaki kliča nas u darohu, heta dzień vialikaha prabačeńnia».
«Nie zabudźciesia pra chatniaje zadańnie: jakaja data majho chrostu? U jaki dzień ja byŭ achryščany ci achryščanaja?» — jašče raz nastojliva paŭtaryŭ papa Francišak naprykancy svajoj pramovy.
