U śledčy izalatar Žodzina pieraviali ŭ subotu 11 supracoŭnikaŭ firmy‑imparciora soku «Sadočok». Dahetul jany znachodzilisia ŭ minskim śledčym izalatary.
Nahadajem, supracoŭniki firmy «Vładprodimport» (9 rehijanalnych pradstaŭnikoŭ, dyrektar i namieśnik) byli zatrymanyja ŭ žniŭni pa padazreńni ŭ datyčnaści da vybuchu ŭ Minsku 4 lipienia.
Biez pradjaŭleńnia abvinavačvańnia i inšych śledčych dziejańniaŭ aryštavanyja znachodzilisia za kratami 10 dzion. 28 žniŭnia im pradjavili abvinavačvańnie. Ale ŭžo va ŭkryćci dachodaŭ i niapłacie padatkaŭ.
Svajaki zatrymanych napisali list na imia kiraŭnictva Administracyi prezidenta i Rady biaśpieki z prośbaj razabracca ŭ situacyi.
Adkazy ŭžo pryjšli. Voś što paviedamiŭ Jeŭraradyjo baćka aryštavanaha rehijanalnaha pradstaŭnika firmy ŭ Baranavičach Viktar Draniuk:
«Jany «adpisalisia». Administracyja prezidenta adpraviła zajavu ŭ milicejskaje viedamstva h. zn. tym, na kaho skardzimsia. Nu a Saŭbiez adpraviŭ list u prakuraturu, a Hienprakuratura adpraviła ŭ Minskuju haradskuju prakuraturu. I pakul kančatkovaha adkazu nichto nam nie daŭ».
Tym časam, pavodle Viktara Draniuka, u spravie «Sadočka» vyjaviłasia raniej nieviadomaja detal:
«Jość jašče adna padobnaja firma ŭ Biełarusi, jakaja pastaŭlaje takija ž soki.Ja pakul jaje nie budu nazyvać, ale viedaju jaje nazvu. I jakraz taja firma, pra jakuju ja havaru, pastaŭlała ich kantrabandaj, handlavała pa «čornym» za najaŭnyja».
Hetuju druhuju firmu pravaachoŭnyja orhany čamuści nie čapajuć, choć usio i viedajuć, padkreślivaje Draniuk.
