Z 2021 hoda FIFA budzie pravodzić novy aficyjny turnir, jaki atrymaje nazvu supierčempijanat śvietu siarod kłubaŭ. U kalendary jon zamienić Kubak kanfiederacyj
FIFA pryniaŭ rašeńnie admianić Kubak kanfiederacyj i zamianić jaho na supierčempijanat śvietu siarod kłubaŭ, paviedamlaje Marca. U turniry, jaki płanujecca pravodzić kožnyja čatyry hady, buduć prymać udzieł 24 kłuby, jakija pradstaŭlajuć šeść kantynientaŭ.
Roŭna pałovu ŭdzielnikaŭ (12) składuć kamandy ź Jeŭropy. U ich lik ŭvojduć pieramožcy i finalisty čatyroch apošnich rozyhryšaŭ Lihi čempijonaŭ. Astatnija ŭdzielniki ad Jeŭropy buduć abranyja, kirujučysia rejtynham UEFA.
Kali b turnir prajšoŭ u nastupnym hodzie, u im by pryniali ŭdzieł čatyry ispanskija kłuby (madrydski «Reał» i «Atletyka», «Barsiełona» i «Sievilja»), dva niamieckija (miunchienskaja «Bavaryja» i dortmundskaja «Barusija»), dva anhielskija («Mančestar Sici» i łondanski «Arsienał»), dva partuhalskija («Bienfika» i «Portu»), turynski «Juvientus» i «Pary Sen-Žermen».
Paŭdniovuju Amieryku na supierčempijanacie śvietu buduć pradstaŭlać piać kłubaŭ, Afryku, Aziju i KONKAKAF (Kanfiederacyju futboła Paŭnočnaj i Centralnaj Amieryki i krain Karybskaha basiejna) — pa dźvie kamandy. Taksama miarkujecca ŭdzieł adnaho kłuba z Akijanii.