Kiraŭnik kampanii «Havary praŭdu» Andrej Dźmitryjeŭ padzialiŭsia z «Našaj Nivaj» uražańniami ad udziełu ŭ pieradačy «Miesca sustrečy» na telekanale NTV.
Dźmitryjeŭ byŭ adzinym, chto pradstaŭlaŭ Biełaruś na NTV. «Pieradača bolš žvavaja, bolš pabudavanaja pa praviłach šou. Aŭdytoryja pahadžajecca z taboj, nie pahadžajecca. Kaža tabie «bu», «tak». Varta adznačyć, što publika kiravanaja.
Źviartała ŭvahu, kali chtości z udzielnikaŭ doŭha havaryŭ, to ludzi ŭ zale pačynali šumieć, kab spynić jaho. Heta ŭsio davoli dobra pastaŭlena z režysiorskaha hledzišča.
Pry hetym papiaredzili, što lepš nie pierapyniać adzin adnaho, a ciahnuć ruku. I za hetym vielmi pilna sačyli.
Pieradača była pryśviečanaja temie «Uschodniaha partniorstva». Tamu, jak dziaržavy, jakija atačajuć Rasiju, šukajuć šlachi, jak supracoŭničać ź Jeŭrapiejskim sajuzam. Ci heta zdrada, ci heta narmalna, jak Rasija stavicca da takoj supracy.
Asabista ja adstojvaŭ pazicyju, što Rasii treba vyznačycca, ci joj treba partnior, ci lokaj. Biełaruś maje prava na svaje nacyjanalnyja intaresy, adstojvać ich. Na siońnia Biełaruś nie robić nijakich zachadaŭ suprać Rasii.
Kali Rasija choča, kab jana była pryciahalnaj dla Biełarusi, to jana nie pavinna pałochać nas Ukrainaj, Livijaj, Siryjaj, bo tam byli takija słovy, i nie ličyć nas žonkaj, mužam ci bratam, a rabić reformy i być pryciahalnaj, vykonvać abaviazalnictvy i razumieć, što my niezaležnaja jeŭrapiejskaja kraina. U našych intaresach siabravać i handlavać z Rasijaj, ale i siabravać i handlavać i z Ukrainaj, i ź Jeŭrasajuzam.
Ja kazaŭ toje, što ličyŭ vartym i mahčymym kazać dla hetaj aŭdytoryi. Nijakich instrukcyj nie było. Tyja, što mohuć, jany pačujuć. A tyja, što nie mohuć, na tych nie treba raźličvać. Ci atrymałasia ŭ mianie, nie viedaju. Važna, što heta byŭ žyvy efir, čaho niama ŭ Biełarusi. Ź jaho ŭžo ničoha nie vyražaš.
Ja liču, što ŭ padobnych šou varta ŭdzielničać, sprabavać vykazacca, adstojvać Biełaruś. Kab na našu krainu nie sprabavali naviešvać usie svaje kryŭdy i strachi».
