Na padstavie adznak krytykaŭ byŭ składzieny hrafik karjery kalektyvu, adpaviedna jakomu z 2000 hodu hurt pieražyvaje tvorčy spad.
Mienavita ŭ 2000 hodzie vyjšaŭ lepšy na pohlad krytykaŭ albom «Try čarapachi», jaki atrymaŭ 9,5 bałaŭ z 10 mahčymych.Paśla jaho hurt vypuściŭ dva dyski, adznaki jakich byli ŭsio nižej: «Dom kultury» (2002, adznaka 8,00) i «06» (2007, adznaka 7,00).
«Miarkuju, što pra niejki mahčymy kryzis vymušaje havaryć nie «Dom kultury», jaki zaniaŭ druhoje miesca ŭ ahulnym retynhu albomaŭ hurta, a mienavita apošni na hety momant dysk «06», — adznačyŭ kiraŭnik «Experty.by» Źmicier Biezkaravajny. — Mnie zdajecca, naŭrad ci možna skazać, što «06» sapraŭdy słaby. Sprava ŭ tym, što mierkavańni adnosna jaho vielmi palarnyja, jak u publiki, hetak i ŭ našych krytykaŭ. Chtości ličyć jaho lepšym paśla «Troch čarapach», chtości — ledź nie najhoršym u historyi kalektyvu, ale pryčyny dla hetaha nie tolki muzyčnyja. Taksama nielha zabyvacca, što hety «kryzisny» dysk uvajšoŭ u lik 10 lepšych albomaŭ 2007 hodu pa viersii sajta «Experty.by». Tamu ŭsio vielmi adnosna».
Lider «N. R. M.» Lavon Volski zhodny, što reakcyja publiki na albom «06» vielmi roznaja. U svaich kamientarach da vynikaŭ daśledvańnia jon tłumačyć mahčymyja pryčyny hetaj situacyi.
«U vypadku z apošnim albomam (ja pra «06») mnie padajecca, što narod chacieŭ pačuć bolš tradycyjny «N. R. M.», a atrymałasia krychu pa‑inšamu. Usio tamu, što my pišam, jak atrymlivajecca, jak adčuvajecca, jak čujecca ŭ niejki peŭny momant. Kab my prosta prahnuli nia stracić papularnaść i zavajavać novych słuchačoŭ, dyk vynik byŭ by inšy. Nieviadoma ci lepšy. Navat u sensie hetaje papularnaści», — miarkuje jon.
Najhoršym dyskam kalektyvu ekśpierty nazvali debiutny albom «La La La La» (1995), jaki atrymaŭ tolki 6 bałaŭ. Poŭnuju viersiju rejtynhu, a taksama kamientary i piersanalny rejtynh albomaŭ «N. R. M.» ad Lavona Volskaha hladzicie na sajcie «Experty.by»
