U 12.00 pačałasia sustreča Devida Merkieła ź liderami apazycyi. Ź biełaruskaha boku ŭ joj biaruć udzieł Vincuk Viačorka, Alaksandar Kazulin, Siarhiej Kalakin, Anatol Labiedźka, Alaksandar Milinkievič.
21 žniŭnia adbyłasia sustreča ministra zamiežnych spraŭ Biełarusi Siarhieja Martynava z namieśnikam pamočnika dziaržaŭnaha sakratara ZŠA Devidam Merkielem, jaki terminova prybyŭ Miensk siońnia ranicaj. "U chodzie sustrečy byŭ detalova razhledžany ŭvieś śpiektr biełaruska-amierykanskich adnosin. Subiasiedniki abmierkavali taksama šlachi palapšeńnia hetych adnosin", - prainfarmavali ŭ pres-słužbie źniešniepalityčnaha viedamstva Biełarusi, paviedamlaje BIEŁTA.
20 žniŭnia na volu z turmaŭ adnačasova vyjšli mienski moładzievy aktyvist Andrej Kim i viciebski pradprymalnik Siarhiej Parsiukievič. Upieršyniu za apošnija hady ŭ krainie nie zastałosia nivodnaha palityčnaha źniavolenaha.
Vyzvaleńnie abodvuch apazycyjaneraŭ adbyłosia praz pamiłavańnie kiraŭnikom dziaržavy. Nahadajem, što jašče niekalki tydniaŭ tamu pijarščyk Łukašenki Cim Beł u interviju «Financial Times» abiacaŭ, što palitviaźni vyjduć na volu pierad parlamenckimi vybarami.
Vyzvaleńnie palitviaźniaŭ daje padstavy dla pieršasnaj narmalizacyi adnosinaŭ z ZŠA i ES.
I reakcyja ZŠA nie prymusiła doŭha čakać. Jašče ŭčora Dziarždepartament raspaŭsiudziŭ pres?reliz ab sytuacyi ŭ Biełarusi. «ZŠA vitajuć vyzvaleńnie 20 žniŭnia dvuch apošnich palitviaźniaŭ, jakoje stała praciaham vyzvaleńnia Alaksandra Kazulina,» — havorycca ŭ zajavie.
«Vyzvaleńnie hetych asobaŭ, jakoje, jak my spadziajemsia, budzie spałučana z dalejšymi pazytyŭnymi krokami, adkryvaje realnuju mahčymaść dla značnaha palapšeńnia adnosinaŭ pamiž ZŠA i Biełaruśsiu. Vyzvaleńnie hetych hramadzianaŭ razam ź inšym daje nam nadzieju na budučyja pazytyŭnyja kroki, prapanovy realnych mahčymaściaŭ istotnaha palapšeńnia u stasunkach pamiž ZŠA i Biełaruśsiu», — havorycca ŭ zajavie pres?sakratara Dziaržepartamentu ZŠA Roberta Vuda.
Zhodna z pres-relizam, u śviatle raźvićcia padziejaŭ namieśnik pamočnika dziaržsakratara ZŠA ŭ spravach Eŭropy i Eŭrazii Devid Merkieł nieadkładna vylataje ŭ Miensk «dla sustrečaŭ ź biełaruskimi aficyjnymi asobami i pradstaŭnikami demakratyčnaj apazycyi».
