Jana Ždanava, aktyvistka ruchu Femen, viadomaha svaimi skandalnymi akcyjami, zajaviła, što arhanizacyja faktyčna raspałasia jašče ŭ 2015 hodzie, a akcyi, jakija da hetaha času prachodziać pad hetym brendam, pravodziacca byłymi ŭdzielnicami ruchu pa ŭłasnaj inicyjatyvie. Pra heta piša VVS.
Ruch Femen byŭ zasnavany ŭ 2008 hodzie Hannaj Hucoł (źleva), a ŭ liku najbolš viadomych aktyvistak byli Alaksandra Šaŭčenka (u centry) i Jana Ždanava (sprava). Fota Getty
U intervju ŭkrainskamu vydańniu «Apostraf». Ždanava, jakaja žyvie ciapier u Paryžy, zajaviła, što «ŭsie razyšlisia, jak u mory karabli». «Kamandy, jakaja była raniej, užo niama», — dadała jana.
U adkaz na ŭdakładniajučaje pytańnie ab tym. chto ž tady pravodzić ad imia Femen akcyi ŭ Jeŭropie i Ukrainie, Ždanava patłumačyła, što sapraŭdy i ŭ Ispanii, i ŭ Francyi, i v Ukrainie zastalisia niekalki aktyvistak, jakija sprabujuć niešta rabić.
«Ale takoje: siadzieli-siadzieli, a potym raptam padumali, a ci nie pajści nam niešta zrabić? Sistemy i taho kancepta, jaki byŭ pieršapačatkova, kali my štodnia biez vychadnych i kanikuł pracavali na karyść našaj idei, — heta ŭsio skončyłasia», — skazała aktyvistka.
Pavodle jaje słoŭ, u 2013 hodzie ruch pierajechaŭ z Ukrainy ŭ Francyju, a zatym praisnavaŭ jašče dva hady. Paśla hetaha, jak śćviardžaje Ždanava, «usio pačało traščać pa švach i razvalvacca».
Aktyvistka adznačyła, što navat nie viedaje, chto ciapier u Francyi zajmajecca sajtam Femen i viadzie staronku ruchu ŭ fejsbuku.
A bolšaść žančyn, jakija pravodziać akcyi ad imia Femen, jak zdajecca Ždanavaj, naohuł nie razumiejuć, što robiać.
«Ciapier Femen — heta nie arhanizacyja, a styl pratestu. Toj styl, jaki my stvarali na praciahu ŭsiaho isnavańnia našaj arhanizacyi, prosta zapazyčajuć», — ličyć Ždanava.
