Pry ŭradzie Biełarusi sfarmiravanaja kamisija pa vyjaŭleńni, viartańni, sumiesnym vykarystańni i ŭviadzieńni ŭ navukovy i kulturny abarot kulturnych kaštoŭnaściaŭ, jakija znachodziacca pa-za miežami krainy.
Rašeńnie stvaryć kamisiju zamacavanaje ŭ pastanovie Savieta ministraŭ № 25 ad 13 studzienia 2017 hoda, apublikavanaj na sajcie ŭrada.
Sustaršyniami kamisii pryznačanyja namieśnik ministra zamiežnych spraŭ Valancin Rybakoŭ i namieśnik ministra kultury Alaksandr Jacko.
U skład hrupy taksama ŭvajšli staršynia Biełaruskaha fondu kultury (BFK) Uładzimir Hilep, staršynia kamisii «Viartańnie» pry BFK Adam Maldzis, namieśnik ministra infarmacyi Alaksandr Karlukievič, namieśnik ministra finansaŭ Juryj Silviestraŭ, dyrektar Centra daśledavańniaŭ biełaruskaj kultury, movy i litaratury Nacyjanalnaj akademii navuk Alaksandr Łakotka, dyrektar Nacyjanalnaha histaryčnaha archiva Źmicier Jacevič i namieśnik načalnika hałoŭnaha ŭpraŭleńnia šmatbakovaj dypłamatyi — načalnik upraŭleńnia hłabalnaj palityki i humanitarnaha supracoŭnictva MZS Vadzim Pisarevič.
Hetaj ža pastanovaj urad zaćvierdziŭ pieralik z 12 dziaržaŭnych ustanoŭ kultury, jakija majuć asablivaje značeńnie dla zachavańnia, raźvićcia i papularyzacyi biełaruskaj nacyjanalnaj kultury. Pytańni ich rearhanizacyi i likvidacyi zaraz mohuć razhladacca tolki sa zhody Saŭmina.
U śpis uvajšli try minskija teatry — Nacyjanalny akademičny teatr imia Janki Kupały, Nacyjanalny akademičny dramatyčny teatr imia Maksima Horkaha, Nacyjanalny akademičny Vialiki teatr opiery i baleta, a taksama viciebski Nacyjanalny akademičny dramatyčny teatr imia Jakuba Kołasa.
Asablivaje značeńnie ŭrad nadaŭ trom VNU — Biełaruskamu dziaržaŭnamu ŭniviersitetu kultury i mastactvaŭ, Biełaruskaj dziaržaŭnaj akademii mastactvaŭ i Biełaruskaj dziaržaŭnaj akademii muzyki, a taksama dźvium muzyčnym ustanovam — Biełdziaržfiłarmonii i Nacyjanalnamu akademičnamu narodnamu choru imia Hienadzia Citoviča.
U pieralik uvajšli dźvie muziejnyja ŭstanovy — Nacyjanalny mastacki muziej i Nacyjanalny histaryčny muziej.
Svajoj pastanovaj Saŭmin taksama zaćvierdziŭ abnoŭlenuju redakcyja pravił akazańnia pasłuh pa pakazie filmaŭ i ŭdakładniŭ termin dziejańnia dazvołaŭ na raźmiaščeńnie vonkavaj rekłamy. U cełym pryniaty dakumient unosić papraŭki ŭ 16 dziejnych pastanoŭ urada, a taksama admianiaje dziejańnie 40 inšych pastanoŭ Saŭmina.
Dakumient nabyvaje moc 3 lutaha.
