Vydačaj rašeńniaŭ ab kłasifikacyi filmaŭ budzie zajmacca dziaržaŭnaja ŭstanova adukacyi «Instytut kultury Biełarusi». Heta praduhledžana pastanovaj Savieta Ministraŭ ad 12 studzienia 2017 hoda numar 21 «Ab ažyćciaŭleńni asobnych administracyjnych pracedur u śfiery kultury», paviedamili ŭ pres-słužbie biełaruskaha ŭrada.
Pastanova pryniata dla pryviadzieńnia terminałohii, što prymianiajecca ŭ pastanovach urada da ŭstupleńnia ŭ siłu Kodeksa ab kultury, u adpaviednaść z terminałohijaj, ustanoŭlenaj hetym kodeksam. U suviazi z hetym karekcirujecca šerah pastanoŭ Saŭmina.
Praduhledžana, što horadabudaŭničyja prajekty, jakija źmiaščajuć źviestki ab archieałahičnych abjektach, za vyklučeńniem pomnikaŭ archieałohii, padlahajuć uzhadnieńniu z Nacyjanalnaj akademijaj navuk, a horadabudaŭničyja prajekty, jakija źmiaščajuć źviestki ab pomnikach archieałohii, padlahajuć uzhadnieńniu ź Ministerstvam kultury.
U adzinym pieraliku administracyjnych pracedur zamacoŭvajucca administracyjnyja pracedury, praduhledžanyja kodeksam, i vyklučajucca abo karekcirujucca raniej zamacavanyja ŭ hetym pieraliku. Tak, administracyjnaja pracedura «Dziaržaŭnaja rehistracyja filma i vydača dziaržaŭnaha rehistracyjnaha paśviedčańnia na film» zamianiajecca na «Vydaču rašeńnia ab kłasifikacyi». Ažyćciaŭleńniem hetaj administracyjnaj pracedury zojmiecca Instytut kultury, jana budzie biaspłatnaj. Vydadzienyja rašeńni buduć dziejničać biesterminova. Termin ažyćciaŭleńnia pracedury — 5 kalandarnych dzion, a ŭ vypadku nieabchodnaści nakiravańnia filma ŭ Respublikanskuju ekśpiertnuju kamisiju pa praduchileńni prapahandy parnahrafii, nasilla i žorstkaści abo Respublikanskuju ekśpiertnuju kamisiju pa acency infarmacyjnaj pradukcyi na pradmiet najaŭnaści (adsutnaści) u joj prykmiet prajaŭ ekstremizmu — 30 kalandarnych dzion.
Pastanovaj taksama zamacavana, što dazvoły na ekspłuatacyju kinazały abo kinaabstalavańnia budzie vydavać rajonny (haradski) vykankam, administracyja rajona. Dazvoły buduć vydavacca biaspłatna i dziejničać 5 hadoŭ.
Akramia taho, zaćvierdžana pałažeńnie ab paradku vydačy dazvołu na ekspłuatacyju kinazałaŭ, inšych śpiecyjalna abstalavanych pamiaškańniaŭ (miesc), asnaščanych kinaabstalavańniem, i takoha abstalavańnia (zamiest pałažeńnia ab paradku vydačy dazvołaŭ na ekspłuatacyju śpiecyjalna abstalavanych pamiaškańniaŭ (miesc) i raźmieščanaha ŭ ich kina- abo videaprajekcyjnaha abstalavańnia, pryznačanych dla pakazu filmaŭ).
Pastanova ŭstupić u siłu z 3 lutaha.
