Redakcyja časopisa «Kultura, Nacyja» ščyra vinšuje čytačoŭ «Našaj Nivy» z Novym 2017 hodam i zyčyć usim dobraha zdaroŭja, lubovi, pośpiechaŭ u spravach, udačy, dabrabytu siemjam.
Časopis pačynajecca tekstam «Stratehii raźvićcia biełaruskaj nacyi», abmierkavańnie jakoj doŭžycca amal poŭny hod. Prajekt «Stratehii raźvićcia biełaruskaj nacyi», u pieršapačatkovaj raspracoŭcy jakoha brali ŭdzieł A. Anisim, A. Kašo, P. Murzionak, A. Trusaŭ, I. Šumskaja, upieršyniu byŭ apublikavany na staronkach časopisa «Kultura, Nacyja» 6 lutaha 2016 hoda, a taksama ŭ haziecie «Naša Niva» (7 lutaha), haziecie «Novy čas», na veb-sajtach Zhurtavańnia biełarusaŭ śvietu «Baćkaŭščyna», Tavarystva biełaruskaj movy, «My — nacyja», «Naša ziamla», «Pahonia» (Čechija), Belarus News. Prajekt abmiarkoŭvaŭsia biełaruskaj redakcyjaj Polskaha radyjo (27 lutaha 2016 hoda) i na «Biełsacie» (12 sakavika 2016 hoda). Redakcyja časopisa vykazvaje ščyruju ŭdziačnaść sp. A. Astroŭskamu, sp. M. Kieńku, sp. V. Stanišeŭskamu, sp. V. Šyško, sp. V. Jakavienku za krytyčnyja zaŭvahi, dapaŭnieńni i praŭki pa styli i movie dakumienta.
Prapanavany dakumient Stratehii adkryty dla dalejšaj dyskusii. Kali łaska, svaje kamientary i zaŭvahi dasyłajcie na adras: [email protected]. Redakcyja časopisa prosić arhanizacyi, jakija ŭ asnoŭnym zhodny z pałažeńniami Stratehii, dałučacca da vykanańnia jaje zadač. Na siońnia, da vykanańnia zadač Stratehii dałučylisia nastupnyja arhanizacyi: časopis «Kultura, Nacyja», Tavarystva biełaruskaj movy.
U praciah dyskusii pa «Stratehii raźvićcia biełaruskaj nacyi» ŭ 16-m numary raźmieščany dva artykuły P. Murzionka, pryśviečanyja abhruntavańniu adnaho z klučavych momantaŭ u realizacyi Stratehii — niejtralnaści Biełarusi. Pieršy artykuł aśviatlaje histaryčnyja aśpiekty prablemy niejtralnaści (u asnoŭnym dla jeŭrapiejskich krain) na praciahu apošnich stahodździaŭ. Druhi artykuł całkam tyčycca prablem niejtralnaści, jakija mohuć mieć dačynieńnie da nabyćcia takoha stanu Biełaruśsiu.
Stan niejtralnaści, nabyty z padtrymkaj hramadstva praz refierendum, moža zabiaśpiečyć pravavyja i maralnyja padstavy dla vyjścia krainy z ahresiŭnych vajennych błokaŭ i niedałučeńnia da inšych i ŭ toj ža čas adkryje šlach da ŭstupleńnia ŭ hłabalnuju sistemu(y) kalektyŭnaj biaśpieki. Pa situacyi, jakaja składyvajecca na ciapierašni čas, pryniaćcie stanu niejtralnaści na refierendumie moža stacca adzinym mahčymym krokam, kab vyrvacca z kałanijalnaj zaležnaści ad Rasii. Niejtralnaść\uzbrojenaja niejtralnaść dla Biełarusi hruntujecca na miralubivym nastroi biełaruskaha nasielnictva, na jurydyčnaj normie ab imknieńni być niejtralnaj dziaržavaj (Kanstytucyja RB, Art. 18), na siabroŭstvie ŭ Ruchu niedałučeńnia i AAN, na roznanakiravanaści biełaruskaj ekanomiki, i na prykładach inšych krain, jakija chočuć vyzvalicca z-pad cisku vialikich krain.
U hetym hodzie spoŭniłasia 125 hadoŭ z dnia naradžeńnia Maksima Bahdanoviča. U aznačeńnie hetaj padziei časopis «Kultura, Nacyja» drukuje padborku materyjałaŭ, dasłanych biełaruskim paetam, pierakładčykam i prazaikam sp. S. Paniźnikam. U hetuju cikavuju i bahatuju padborku ŭvajšli natatki aŭtara «Spyniajucca imhnieńni» pra «sustreču» z paetam u Jałcie, dva vieršy, pryśviečanyja M. Bahdanoviču — «Zarok Maksimu» i «Na prybierahu Hurona», pierakład vierša ŭkrainskaha paeta Mikoły Piatrenki «Sonca nad pieśniaju M. Bahdanoviča», svojeasablivaja spravazdača sp. S. Paniźnika ŭ aznačeńnie 125-hodździa z dnia naradžeńnia tvorcy «Pad kronaj nadziei», a taksama archiŭny artykuł K. Jezavitava «Nienadrukavanyja tvory Maksima Bahdanoviča» (z časopisa «Novy Šlach», № 1, 1944, Ryha).
Jubilejnaj dacie pryśviečany artykuł Niny Debolskaj, u jakim jana dzielicca svaim dośviedam u pierakładzie vieršaŭ Maksima Bahdanoviča na francuzskuju movu.
Sp. S. Paniźnik dasłaŭ u časopis artykuł, pryśviečany jašče adnoj značnaj jubilejnaj dacie ŭ historyi raźvićcia biełaruskaj nacyi — 90-hodździu z dnia adkryćcia Akademičnaj kanfierencyi pa pytańniach reformy biełaruskaha pravapisu i azbuki.
Pryjemnaha čytańnia.
Redaktar časopisa,
Piotra Murzionak
