Dzieci z sacyjalna nieabaronienych siemjaŭ u Irkucku (RF) atrymali ŭ jakaści padarunka ad hubiernatara na Novy hod cukierki, u jakich byli vyjaŭlenyja čarviaki, paviedamlaje VVS sa spasyłkaj na miascovyja ŚMI.
flashsiberia.com
«Žychary Irkucka paviedamili, što ŭ biaspłatnych cukierkach, jakija byli atrymanyja ŭ Irkucku pa linii sacyjalnaj abarony, byli znojdzienyja biełyja čarviaki. Ciapier pravodzicca pravierka — treba adsačyć, adkul padarunak, chto pastaŭščyk, jak farmavaŭsia padarunak», — cytuje vydańnie IrkutskMedia pres-słužbu ŭpraŭleńnia Rasspažyŭnahladu pa Irkuckaj vobłaści.
Jak paviedamiła miascovamu telekanału NTS maci adnaho ź dziaciej, cukierki byli praterminavanymi, na niekatorych ź ich byli ćvil i nalot. Pry hetym, pa jaje słovach, na pakunkach było paznačana, što cukierki śviežyja.
Fotazdymki z sapsavanymi prysmakami źjavilisia ŭ sacyjalnych sietkach. Na ich vyrazna vidać biełych čarviačkoŭ, jakija znachodziacca ŭnutry cukierak.
Jak paviedamlaje infarmacyjnaje ahienctva FlashSiberia, sałodkija nabory ad imia hubiernatara rehijonu atrymali amal 100 tysiač dziaciej sa šmatdzietnych i małamajomnych siemjaŭ.
Pastaŭščyk navahodnich prysmakaŭ byŭ abrany pa vynikach elektronnaha aŭkcyjonu.
Nahadajem, u kancy minułaha hoda 76 čałaviek pamierli ŭ Irkucku ŭ vyniku masavaha atručvańnia śpirtaźmiaščalnaj vadkaściu «Hłoh».