5 studzienia biełarusy Varšavy sabralisia ŭ adkrytaj prastory «Duży Pokój», kab zhulać u «Što? Dzie? Kali?». Biełaruski intelektualny kłub źjaviŭsia ŭ stalicy Polščy ŭpieršyniu, ale adrazu sabraŭ šeść kamand. Ahułam na pieršym «pasiadžeńni» było 37 udzielnikaŭ.
Znataki zhulali 36 pytańniaŭ. Pieramožca — kamanda «Jožy les» — dała na ich 22 dakładnyja adkazy. Darečy, lidary turniru pryjechali ŭ Varšavu z Prahi, a za stałom u ich byli nie tolki biełarusy, ale i azierbajdžancy.
«Siarod udzielnikaŭ hulni byli taksama palaki i ŭkraincy. Kab usie dobra razumieli, pytańni byli pa-rusku. Ale było pytańnie pra «Biełšynu», — raspaviadaje Alaksandr Łapko, adzin z arhanizataraŭ hulni. — Darečy, dumajem zrabić intelektualnuju hulniu na biełaruskaj movie ŭ Biełaruskim domie».
Učorašniaja hulnia skončyłasia takim pytańniem:
«Na karcinie XV stahodździa hałaŭny ŭbor adnaho ź ich lažyć na ziamli, padkreślivajučy nieparaŭnalna mienšuju siłu ŭłady ziamnoj. Nazavicie ich słovam, jakoje pryjšło sa starasłavianskaj».
Adkaz vy daviedajeciesia, kali vyłučycie koleram nastupnuju vobłaść: vieščuny. Kamientaryj: u Boscha jość trypcich «Pakłanieńnie vieščunoŭ». Biblejnyja vieščuny, jak viadoma, byli carami. A ŭ Polščy 6 studzienia adznačajecca Śviata troch karaloŭ.
Nieŭzabavie varšaŭski kłub «Što? Dzie? Kali?» płanuje zładzić nastupnuju hulniu. Za raskładam možna sačyć na staroncy kłuba ŭ Facebook.
