Pryčynaj krušeńnia «Tytanika» mahło stać nie tolki sutyknieńnie z ajśbierham, ale jašče i pažar na borcie. Takuju viersiju vysunuŭ brytanski žurnalist Šenan Małoni, piša Unian sa spasyłkaj na The Independent.
wikimedia.org
Małoni bolš za 30 hadoŭ daśleduje pryčyny krušeńnia «Tytanika». U pryvatnaści, jon vyvučyŭ fatahrafii, źniatyja da taho, jak karabiel vyjšaŭ z sudnavierfi ŭ Biełfaście.
Žurnalist ubačyŭ čornyja paznaki ŭzdoŭž pravaj častki korpusa karabla — jakraz tam, dzie jaho prabiŭ ajśbierh. Paśla ekśpierty paćvierdzili: ślady, imavierna, byli vyklikanyja pažaram u schoviščy paliva.
«My razhledzieli mienavita toje miesca, u jakim zatrymaŭsia ajśbierh, i, zdajecca, hetaja častka korpusa ŭ hetym miescy była vielmi ŭraźlivaja, i heta adbyłosia jašče da taho, jak jon pakinuŭ vierf u Biełfaście», — kaža Małoni. Kamanda z 12 čałaviek sprabavała patušyć połymia, ale jano było zanadta vialikim, kab chutka ŭziać jaho pad kantrol. Jano mahło dasiahnuć tempieratury da 1000 hradusaŭ pa Celsii, što zrabiła korpus «Tytanika» ŭ hetym miescy vielmi słabym. I kali jon stuknuŭsia ab lod, adznačajuć ekśpierty, adrazu ž parvaŭsia.
Vydańnie taksama dadało, što kiraŭnictva łajniera zabaraniła kazać pra pažar pasažyram. «Heta idealnaje supadzieńnie niezvyčajnych faktaraŭ: ahniu, lodu i złačynnaj chałatnaści. Nichto jašče nie rasśledavaŭ hetyja paznaki. Heta całkam mianiaje historyju», — kaža Małoni.
Jak viadoma, «Tytanik» zatanuŭ 15 krasavika 1912 hoda padčas svajho pieršaha rejsa. Sudna sutyknułasia z ajśbierham u Atłantyčnym akijanie. Achviarami katastrofy stali bolš za 1500 čałaviek. Pavodle aficyjnaj viersii, da trahiedyi pryviało toje, što «sudna ruchałasia na vialikaj chutkaści ŭ niebiaśpiečnych abledzianiełych vodach, i kamanda nie zmahła paźbiehnuć sutyknieńnia z ajśbierham».
