Jak stała viadoma «Našaj Nivie» z dypłamatyčnych kołaŭ, 25 listapada z adnadzionnym vizitam u Biełaruś prybudzie premjer-ministr Słavakii Robiert Fica.
U prahramie vizita zapłanavanyja sustrečy z vyšejšym kiraŭnictvam Biełarusi, adkryćcio novaha ofisa pasolstva (jano zastaniecca pa raniejšym adrasie, ale pierajedzie na inšy pavierch), uskładańnie kvietak na płoščy Pieramohi, a taksama vizit u Viciebsk, dzie dziejničaje słavackaja farmaceŭtyčnaja kampanija «Nacivita».
Robiert Fica ad 2012 źjaŭlajecca premjer-ministram Słavakii, jon pradstaŭnik levaj partyi «Kurs — sacyjalnaja demakratyja».
Časta Fica nazyvajuć prarasijskim palitykam, ale heta nie zusim tak. Słavakija viadzie palityku, jakaja najpierš praduhledžvaje ŭłasnyja intaresy. U 2014 hodzie pa terytoryi Słavaččyny byŭ zbudavany hazaprovad dla reviersu hazu va Ukrainu, kali susiedka akazałasia ŭ stanie kanfliktu z Rasijaj.
Vizit Fica — heta najbolš vysoki vizit pradstaŭnika Jeŭrasajuza ŭ Biełaruś ad 2009—2010 hadoŭ, kali ŭ Minsk pryjazdžali premjer-ministr Italii Silvia Bierłuskoni i prezidentka Litvy Dala Hrybaŭskajcie.
