U krasaviku žurnalist ahienctva Asašyejted Pres Juraś Karmanaŭ nabyŭ małako ŭ fiermiera z Chojnickaha rajona. Analiz małaka ŭ Minskim centry hihijeny i epidemijałohii pakazaŭ, što dapuščalnyja normy kolkaści radyjeaktyŭnaha stroncyju pieravyšanyja ŭ 10 razoŭ. Ale ž analiz byŭ, dy nie toj, jak vyśvietliłasia paźniej.
Žurnalist Juraś Karmanaŭ.
Ab čym šum?
Artykuł žurnalista, pryśviečany hetaj historyi, šyroka razyšoŭsia ŭ ŚMI. A homielskaja kampanija «Miłkavita», jakaja zajmajecca vytvorčaściu małočnaj pradukcyi, padała na Jurasia Karmanava ŭ sud, bo toj artykuł «nanios škodu dziełavoj reputacyi kampanii». «Miłkavita» zakuplaje małako ŭ miascovych fiermieraŭ i vialikuju kolkaść svajoj pradukcyi ekspartuje ŭ Rasiju.
U svaju čarhu centr hihijeny i epidemijałohii zajaviŭ, što na stroncyj pravierka małaka nie pravodziłasia: pa-pieršaje, dla hetaha nie chapiła b abjomu małaka, što prynios Karmanaŭ, a pa-druhoje, analizy na stroncyj robiacca daŭžej.
Ale ž žurnalist maje daviedku, jakuju jamu vydali paśla analizu małaka. I pakazčyki stroncyju tam jość.
Taja samaja daviedka, u jakoj pieravyšanyja pakazčyki stroncyju (druhi radok źnizu).
U centry hihijeny i epidemijałohii toje nazvali vypadkovaściu — kampjutar prosta ŭpisaŭ ličby ŭ daviedku, bo pavinien byŭ zapoŭnić radok. Adnak pra kankretnyja pakazčyki havorka iści nie moža, bo małako daśledavali radyjemietryčnym mietadam, a na stroncyj praviarajuć śpiektrahrafičnym.
A što tyčycca daviedki, jakuju pradjaŭlaŭ Karmanaŭ, to ŭ joj idzie havorka pra analizy małaka na cezij-137. I hetyja pakazčyki, zhodna z daviedkaj, u normie, padkreślili ŭ centry hihijeny i epidemijałohii.
Dałučyŭsia da spravy i pieršy namieśnik ministra sielskaj haspadarki i charčavańnia Leanid Marynič. Jon taksama zajaviŭ, što stroncyju ŭ małace być nie moža, nazvaŭšy artykuł Karmanava dezinfarmacyjaj.
Razhladać praces pavinny byli ŭ sudzie Maskoŭskaha rajona, ale paźniej spravu pieradali ŭ ekanamičny sud Minska.
22 listapada prajšło padrychtoŭčaje pasiadžeńnie pa spravie. U padrychtoŭčym pasiadžeńni vyśviatlajucca pazicyi bakoŭ i kolkaść dokazaŭ pa spravie.
Spravu razhladaje sudździa Taciana Sapieha.
«Miłkavitu» pradstaŭlaje naniaty advakat Kirył Bizunok. Ad samoha pradpryjemstva na praces nichto nie pryjšoŭ. Davać jakija-niebudź kamientary pa spravie Bizunok admoviŭsia.
Asnoŭnaje patrabavańnie «Miłkavity» — abviaržeńnie infarmacyi pra toj stroncyj. Hrošaj ad Karmanava nie patrabujuć. Sud prosiać pryznać infarmacyju ŭ artykule «Asašyejted pres» niesapraŭdnaj. Taksama «Miłkavita» choča, kab Karmanaŭ apublikavaŭ na sajcie «Asašyejted pres» abviaržeńnie.
Sudzicca buduć doŭha
Svaje chadajnictvy pradastaviŭ i adkazčyk. Karmanaŭ paprasiŭ adkłaści razhlad spravy, bo na pasiadžeńnie nie zmoh trapić jaho advakat Siarhiej Zikracki. Advakat ad «Miłkavity» z hetym nie pahadziŭsia. Sudździa Sapieha vyrašyła, što padrychtoŭčaje pasiadžeńnie moža prajści i bieź Zikrackaha. Praŭda, Karmanaŭ padstrachavaŭsia i zaprasiŭ na praces inšaha advakata, Volhu Zaleskuju.
Zaleskaja zajaviła, što razam z žurnalistam adkazvać pa spravie pavinna i kampanija Asašyejted pres, bo infarmacyju na sajcie raźmiaščała mienavita infarmahienctva, a nie ŭłasnaručna Juraś Karmanaŭ.
Usie patrabavańni Karmanavu dasłali poštaj, padkreśliŭ advakat «Miłkavity». Ale ž, u svaju čarhu, žurnalist zajaviŭ, što ničoha nie atrymlivaŭ — i znoŭ paprasiŭ adkłaści pasiadžeńnie.
Razhladać chadajnictvy sud budzie niekalki dzion. Pasiadžeńnie praciahniecca 28 listapada a pałovie na 12 hadzinu.
