Fota belaruspartisan.org
«Hod, jaki prajšoŭ z momantu papiaredniaj sustrečy, byŭ nasyčany padziejami, u bolšaści svajoj značnymi i tryvožnymi. My žyviem u vielmi ŭzajemaźviazanym śviecie. Novyja vykliki i pahrozy zakranajuć usie krainy. Nichto nie moža adčuvać siabie ŭ biaśpiecy», — skazaŭ Makiej.
Pavodle jaho słoŭ, padčas pasiadžeńnia płanujecca abmierkavać efiektyŭnaść vykarystańnia patencyjału sistemy AAN, u tym liku dla realizacyi metaŭ raźvićcia Biełarusi i Rasii.
Baki taksama abmiarkujuć uzajemadziejańnie ŭ miežach MAHATE. «U apošnija hady hetaja arhanizacyja stała asabliva važnaj dla Biełarusi ŭ kantekście budaŭnictva AES», — adznačyŭ Makiej.
Zakranajučy temu achovy pravoŭ čałavieka, jon padkreśliŭ, što Biełaruś i Rasija «paśladoŭna vystupajuć i ŭsialak pieraškadžajuć palityzacyi hetaha pytańnia».
Pavodle słoŭ Makieja, baki taksama abmiarkujuć uzajemadziejańnie ź Jeŭrasajuzam. «Z ulikam admieny sankcyj u dačynieńni da Biełarusi ŭdałosia pašyryć supracoŭnictva ź ES. Ale niahledziačy na pazityŭnyja zruchi ŭ adnosinach, da poŭnaj narmalizacyi jašče daloka. Biahučy ŭzrovień uzajemadziejańnia pamiž Minskam i Brusielem značna mienš prasunuty, čym u inšych krain — partnioraŭ ES na postsavieckaj prastory», — skazaŭ ministr.
Makiej padkreśliŭ, što Biełaruś taksama zacikaŭlenaja ŭ pašyreńni supracoŭnictva z Savietam Jeŭropy, asabliva ŭ płanie dałučeńnia da jaho mižnarodna-pravavych instytutaŭ. «Adnak, nie źjaŭlajučysia členam Savieta Jeŭropy, Biełaruś nie maje mahčymaści prasoŭvać ŭłasnyja inicyjatyvy ŭ miežach hetaj arhanizacyi», — dadaŭ jon.
Pry hetym Makiej vykazaŭ padziaku rasijskamu boku za akazanuju Biełarusi padtrymku ŭ Saviecie Jeŭropy.
Pavodle jaho słoŭ, na siońniašnim pasiadžeńni baki taksama majuć namier abmierkavać sproby falsifikacyi historyi i pierahladu vynikaŭ Druhoj suśvietnaj vajny, jakija ŭ apošniaje dziesiacihodździe nabyvajuć «sistemny i aburalny charaktar». «Usio čaściej my vymušanyja razhladać hetuju situacyju z punkta hledžańnia infarmacyjnych vojnaŭ», — skazaŭ ministr, padkreśliŭšy, što Biełaruś i Rasija majuć namier usialak hetamu supraćstajać.
U svaju čarhu ministr zamiežnych spraŭ Rasii Siarhiej Łaŭroŭ nahadaŭ, što sioleta adznačajuć 20-hodździe padpisańnia pahadnieńnia ab stvareńni Sajuznaj dziaržavy. Pavodle jaho słoŭ, za hetyja hady dźvie krainy zdoleli vybudavać paŭnavartasnaje dvuchbakovaje supracoŭnictva. U Biełarusi i Rasii supadajuć pazicyi «pa ŭsich pytańniach sučasnaści», padkreśliŭ Łaŭroŭ.
«Cenim, što našy biełaruskija siabry ładziać dyjałoh ź ES i Paŭnočnaatłantyčnym aljansam z ulikam svaich abaviazacielstvaŭ u JEAES i ADKB», — dadaŭ kiraŭnik rasijskaha MZS.
