Manumient u honar Raula Valenbierha ŭ Stakholmie, photo: Janerik Henriksson/TT
Ułady Šviecyi aficyjna pryznali śmierć svajho dypłamata Raula Valenbierha, jaki vyratavaŭ žyćci dziasiatkaŭ tysiač vienhierskich jaŭrejaŭ padčas Druhoj suśvietnaj vajny, praz 71 hod paśla jaho źniknieńnia ŭ SSSR, pieradaje rbc.ru sa spasyłkaj na Associated Press.
Jak adznačaje ahienctva, padatkovaje viedamstva karaleŭstva, jakoje rehistruje naradžalnaść i śmierci hramadzian Šviecyi, abjaviła, što Valenbierh pamior 31 lipienia 1952 hoda.
Raul Valenbierh u 1944 hodzie byŭ pryznačany pieršym sakratarom šviedskaha dypłamatyčnaha pradstaŭnictva ŭ Budapiešcie, i karystajučysia svaim dypłamatyčnym statusam, zdoleŭ vyratavać padčas Chałakostu dziasiatki tysiač vienhierskich jaŭrejaŭ. U 1945 hodzie paśla ŭziaćcia Čyrvonaj armijaj Budapiešta jon byŭ aryštavany. Jaho pieranakiravali ŭ Maskvu, dzie ŭtrymlivali ŭ Łubianskaj unutranaj i lefortaŭskaj turmach. U 1957 hodu savieckija ŭłady pryznali, što Valenbierh pamior ad sardečnaha prystupu ŭ turmie 17 lipienia 1947 hoda.
Rasśledavańnie abstavinaŭ śmierci dypłamata doŭžyłasia 71 hod. Za hety čas było arhanizavana niekalki ekśpiertyz, adna z apošnich — rasijska-šviedskaja kamisija, jakaja raspačała rasśledavańnie ŭ 1991 hodzie, — pracavała dziesiać hadoŭ.
