Aŭstryjski kulturny siezon projdzie ŭ Biełarusi, paviedamili ŭ Biełdziaržfiłarmonii.
BiełTA
Dźvie suśvietnyja premjery ŭ adzin viečar prahučać na scenie Biełdziaržfiłarmonii. Kamierny arkiestr Biełarusi pad kiraŭnictvam Jaŭhiena Buškova 5 listapada pradstavić prahramu «Aŭstryja - dalokaja i blizkaja». Jana adkryje Aŭstryjski kulturny siezon u Biełarusi. Arkiestr vykanaje Kancert numar 5 Mocarta dla skrypki z arkiestram. Taksama prahučyć Kvartet Bietchoviena ŭ arkiestroŭcy Malera. Akramia šedeŭraŭ suśvietnaj kłasičnaj muzyki publika aznajomicca z tvorami sučasnych aŭstryjskich kampazitaraŭ, jakija buduć haściami Biełdziaržfiłarmonii ŭ hety viečar. Prahučać «Kampanuła» dla skrypki z arkiestram Habryjele Proj i «Navieleta» dla strunnaha arkiestra na temy dźviuch biełaruskich narodnych piesień Eryka Frajtaha.
«Eryk Frajtah zaŭsiody daskanała vyvučaje muzyčnuju kulturu krainy, jakaja jaho cikavić. Dziakujučy tamu, što žonka kampazitara rodam ź Biełarusi, u ruki da jaho trapiŭ zbornik «100 biełaruskich narodnych piesień». Toje, jakija pieśni Eryk vybraŭ i pakłaŭ u asnovu svajho tvora, śviedčyć ab jaho vytančanym muzyčnym huście», - adznačyŭ Jaŭhien Buškoŭ.
Salistkaj u prahramie «Aŭstryja - dalokaja i blizkaja» vystupić skrypačka Alena Dzianisava, jakaja doŭhi čas žyvie i pracuje ŭ Aŭstryi. Śpiecyjalna dla jaje stvarajucca novyja tvory, jaje vystupleńniaŭ čakajuć u mnohich krainach. A samu Alenu nazyvajuć «skrypičnaj Pijaf» za artystyzm. Akramia Kancerta Mocarta i premjery Habryjele Proj Alena Dzianisava vykanaje «Try valsy» Fryca Krejślera.
Aŭstryjski kulturny siezon u Biełarusi pačniecca z muzyčnych mierapryjemstvaŭ i pradoŭžycca vystaŭkami, demanstracyjami litaraturnych tvoraŭ i žyvapisu.
