Pasiadžeńnie Savieta dyrektaraŭ Mižnarodnaha valutnaha fondu, na jakim moža być razhledžana pytańnie ab vydzialeńni kredytu Biełarusi, adbudziecca ŭ śniežni 2016 hoda abo ŭ studzieni 2017 hoda.
U suviazi z hetym biełaruski bok raźličvaje ŭ samyja karotkija terminy ŭzhadnić z MVF prajekty techničnaha miemaranduma i listy ab namierach — dakumientaŭ, jakija źjaŭlajucca asnovaj dla novaj prahramy Biełarusi z fondam.
Pry hetym čakajecca, što ŭ listapadzie ŭ Minsk prybuduć techničnyja misii MVF i Suśvietnaha banka dla vyrašeńnia prablemnych pytańniaŭ, jakija ŭ najbolšaj stupieni chvalujuć biełaruskija ŭłady. Havorka idzie pra sacyjalnyja nastupstvy pavyšeńnia taryfaŭ na žyllova-kamunalnyja pasłuhi, a taksama patencyjny rost biespracoŭja ŭ suviazi z refarmavańniem siektara dziaržpradpryjemstvaŭ.
3 kastryčnika na naradzie, pryśviečanaj uzajemadziejańniu Biełarusi z MVF, Alaksandr Łukašenka raskrytykavaŭ rekamiendacyi valutnaha fondu. «Kali ich umovy pračytaješ, usio zvodzicca da adnaho: nijakaha pavyšeńnia zarpłaty, nieadkładnaje pavyšeńnie taryfaŭ i inšaha. Kamunisty b skazali — na ŭdušeńnie naroda. Ja nie chaču skazać, što nas niechta choča ŭdušyć. Nas nichto nie panukaje, ale, na žal, formuła takaja», — skazaŭ kiraŭnik dziaržavy. Pry hetym jon dadaŭ, što nie ŭsie patrabavańni MVF «padychodziać pad hetu niehatyŭnuju farmuloŭku».
U svaju čarhu, ministr finansaŭ Uładzimir Amaryn, kamientujučy ŭ kastryčniku žurnalistam vyniki zhadanaj narady, zajaviŭ, što biełaruski bok budzie praciahvać pieramovy z MVF i raźličvaje vyjści na novuju prahramu z valutnym fondam da kanca hoda.
