Fota FK «Urał»
U niadzielu, 30 kastryčnika, u matčy rasijskaj futbolnaj premjer-lihi «Urał» ź Jekaciarynburha, jaki treniruje biełarus Vadzim Skrypčanka, na svaim poli prajhraŭ hroźnienskamu «Cieraku» ź likam 1:4. Try hały z čatyroch «Cierak» zabiŭ paśla niedarečnych pamyłak abaroncaŭ «Urała».
U pierapynku matču, kali lik jašče byŭ roŭnym, staŭki bukmiekieraŭ na pieramohu kamandy ź Jekaciarynburha vyraśli amal u piać razoŭ — z 3,28 da 15,5. Zvyčajna taki rezki rost aznačaje, što bukmiekiery ličać matč dahavarnym.
«Cierak» i «Urał» užo treci siezon zapar padazrajuć u niesumlennaj hulni, kiraŭnictva kamand usio admaŭlaje, piša meduza.io.
Da pierapynku hulnia pamiž «Urałam» i «Cierakam» była praktyčna roŭnaj. Kamanda ź Jekaciarynburha navat paviała ŭ liku. Pierad pierapynkam «Urał» zrabiŭ pieršuju niedarečnuju pamyłku: abaronca z fłanhu adpasavaŭ miač varataru Dźmitryju Arapavu, hałkipier prabiŭ prosta ŭ supiernika, i miač rykašetam zalacieŭ u varoty.
U pačatku druhoha tajma ź intervałam u try chviliny abaroncy «Urała» dapuścili jašče dźvie pamyłki, bolš ułaścivyja dziciačamu futbołu.
U pieršym vypadku forvard «Cieraka» ź mietra zabivaŭ u pustyja varoty, u druhim vypadku ź mietra ŭ pustyja varoty aŭtahoł zabiŭ abaronca «Urała». Paśla hetaha kamandy, pa sutnaści, dahulvali matč.
Bukmiekiery niešta zapadozryli jašče ŭ pierapynku. Pierad matčam i adrazu paśla jaho pačatku «Cierak» ličyŭsia tolki nievialikim favarytam. Kaeficyjent stavak na «Cierak» składaŭ 2,04, na «Urał» — 3,9. Ale ŭ pierapynku kaeficyjent na pieramohu «Urała» vyras da 15,5 — heta vielmi šmat, taki kaeficyjent byŭ by darečnym, kali b u Jekaciarynburh pryjechała «Barsiełona», a nie «Cierak», jaki padniaŭsia paśla hetaha matču na čaćviortaje miesca ŭ čempijanacie Rasii.
Zvyčajna takija kaeficyjenty bukmiekiery vystaŭlajuć, kali padazrajuć, što toj ci inšy matč maje damoŭny charaktar i jaho vynik vyrašany.
«Cierak» i «Urał» padazrajuć u dziŭnych matčach pamiž saboj ź viasny 2015 hoda.
30 maja 2015 «Cierak», jaki ŭžo vyrašyŭ usie zadačy na siezon, prajhraŭ na svaim poli «Urału» i dapamoh tamu zachavać miesca ŭ premjer-lizie.
U nastupnym siezonie pierad matčam hetych kamand u adstaŭku padaŭ trenier «Urała», taksama biełarus, Viktar Hančarenka — choć jon byŭ tolki pryznačany na pasadu letam 2015-ha i paśpieŭ pravieści z «Urałam» niekalki hulniaŭ.
Matč prajšoŭ pad vielmi pilnaj uvahaj ŚMI i zaviaršyŭsia ŭničyju. Matč u adkaz hetych kamand u Hroznym taksama vyklikaŭ asablivuju ŭvahu u bukmiekieraŭ i znoŭ zaviaršyŭsia ŭničyju.
40-hadovy Vadzim Skrypčanka — biełaruski futbalist rodam z Małaryty, a ciapier — trenier «Urała».
Ličycca, što «abmien» vynikami pamiž kamandami z druhoj pałovy turnirnaj tablicy — zvyčajnaja, raspaŭsiudžanaja va ŭsich dyvizijonach rasijskaha futboła źjava. Kamandy takim čynam dapamahajuć adzin adnamu nie vylecieć u nižejšy dyvizijon. Aficyjna ŭ damoŭnych hulniach nie byŭ abvinavačany nichto. Kiraŭnictva kamand niesumlennuju hulniu admaŭlaje.
Hladzi taksama: Sports.ru. Samy haniebny matč vosieni
Heta na ich sumleńni. Jak dobra być Viktaram Hančarenkam — Sport-Ekspriess
