Saviet Ministraŭ zaćvierdziŭ pakiet dakumientaŭ da papravak u niekatoryja biełaruskija zakony, jakija datyčacca abarony dziaciej ad infarmacyi, jakaja moža pryčynić škodu ich zdaroŭju i raźvićciu. Apaviednaje rašeńnie źmieščana ŭ pastanovie ŭrada ad 25 kastryčnika 2016 hoda numar 871.
Siarod inšaha razmova idzie ab pałažeńni, jakim ustanaŭlivajecca paradak markiroŭki infarmacyjnaj pradukcyi (akramia filmaŭ, pryznačanych dla pakazu na terytoryi Biełarusi), u im taksama prapisany niekatoryja asablivaści jaje raspaŭsiudžvańnia. U hetym vypadku majucca na ŭvazie ŭzrostavyja katehoryi «0+» (što aznačaje biez abmiežavańniaŭ, abo ŭniviersalnaja), «6+» (dla asob, jakija dasiahnuli šaści hadoŭ), a taksama katehoryi «12+», «16+» i «18+». Katehoryja «18+», inakš kažučy, aznačaje, što heta pradukcyja zabaroniena dla dziaciej.
Kali havaryć kankretna, prysvajeńnie znaka ŭzrostavaj katehoryi datyčycca drukavanych, televizijnych i radyjnych srodkaŭ masavaj infarmacyi, drukavanych vydańniaŭ, infarmacyjnych resursaŭ (ich sastaŭnych častak), raźmieščanych u internecie, a taksama kampjutarnych hulniaŭ, aŭdyjavizualnych tvoraŭ, fanahram i h.d.
Pry hetym dla raspaŭsiudžvańnia na terytoryi Biełarusi infarmacyjnaj pradukcyi, vyrablenaj za miažoj (kali raniej jana nie była pramarkiravana), raspaŭsiudžvalnik maje prava ŭ adpaviednaści z ustanoŭlenymi kryteryjami zrabić heta samastojna. U pryvatnaści, šlacham raźmiaščeńnia naklejki z vyjavaj markirovačnaha znaka niepasredna na infarmacyjnaj pradukcyi, abo na prymacavanaj da joj etykietcy, abo na spažyvieckaj upakoŭcy, abo na afišach i inšych abjavach ab kulturnym mierapryjemstvie. Heta ž praviła raspaŭsiudžvajecca na markiroŭku ŭvachodnych biletaŭ, zaprašeńniaŭ abo inšych dakumientaŭ, jakija dajuć prava naviedvać kulturnyja mierapryjemstvy.
Što ž datyčycca markiroŭki radyjopieradač, to ŭ hetym vypadku majecca na ŭvazie hukavoje papiaredžańnie, jakoje pakazvaje na ŭzrostavuju katehoryju dziaciej, siarod jakich dapuskajecca raspaŭsiudžvańnie. U svaju čarhu ŭładalnik infarmacyjnaha resursu (jaho sastaŭnoj častki) u internecie maje prava raźmiaścić znak uzrostavaj katehoryi na hałoŭnaj staroncy hetaha resursu, u zručnym dla ahladu miescy.
Jašče adno raspracavanaje pałažeńnie ŭstanaŭlivaje kryteryi vyznačeńnia ŭzrostavaj katehoryi dziaciej, siarod jakich dapuskajecca raspaŭsiudžvańnie toj abo inšaj infarmacyjnaj pradukcyi. Tak, naprykład, da kryteryjaŭ vyznačeńnia ŭzrostavaj katehoryi naležać tematyka, žanr, źmiest i mastackaje afarmleńnie infarmacyjnaj pradukcyi. Buduć uličvacca asablivaści ŭsprymańnia infarmacyi dziećmi peŭnaha ŭzrostu i mahčymaść niehatyŭnaha ŭździejańnia na ich infarmacyi, a taksama šerah inšych faktaraŭ.
Akramia taho, u pakiecie dakumientaŭ zaćvierdžana Pałažeńnie ab hramadska-kansultatyŭnym saviecie pa abaronie dziaciej ad infarmacyi, jakaja pryčyniaje škodu ich zdaroŭju i raźvićciu. Raniej ab hetym saviecie, jaki stvarajecca pry biełaruskim uradzie, havaryŭ ministr adukacyi Michaił Žuraŭkoŭ. Saviet źjaŭlajecca hramadskim kansultacyjnym i kaardynacyjnym orhanam u nazvanaj śfiery, mienavita jon budzie vypracoŭvać rekamiendacyi i prapanovy pa farmiravańni i praviadzieńni adpaviednaj dziaržpalityki.
Hramadska-kansultatyŭny saviet farmirujecca z pradstaŭnikoŭ respublikanskich orhanaŭ dziaržkiravańnia, hramadskich abjadnańniaŭ i inšych arhanizacyj. Uznačalić jaho ministr infarmacyi Biełarusi Lilija Ananič. Staršynia savieta, jaho namieśniki i inšyja ŭdzielniki buduć pracavać na hramadskich pačatkach. Pry hetym da raboty pa miery nieabchodnaści mohuć pryciahvacca śpiecyjalisty, vučonyja i ekśpierty inšych arhanizacyj (ź ich zhody), taksama na biazvypłatnaj asnovie.
Pastanova ŭstupaje ŭ siłu z 1 lipienia 2017 hoda.
