Błohier Eduard Palčys 28 kastryčnika vyjšaŭ na volu paśla amal 10 miesiacaŭ, jakija jon pravioŭ za kratami. Jon byŭ asudžany na 1 hod i 9 miesiacaŭ źniavoleńnia biez nakiravańnia ŭ vypraŭlenčuju ŭstanovu. Heta značyć, što jaho jašče čakaje kala 2 miesiacaŭ tak zvanaj «chatniaj chimii». Adzin dzień u SIZA idzie jak dva na «chimii».
Fota Siarhieja Hudzilina.
Eduarda Palčysa pryznali vinavatym pa artykule 130 č.1 «Naŭmysnaje dziejańnie, nakiravanaje na ŭzbudžeńnie rasavaj, nacyjanalnaj, relihijnaj varažniečy» i pa artykule 343 č.2 «Raspaŭsiud parnahrafičnych materyjałaŭ praź Internet».
Eduard Palčys na svabodzie vioŭ błoh 1863x.com. «Naša Niva» prapanuje pieršuju reakcyju Palčysa paśla vyzvaleńnia.
«Dziakuj presie, rodnym, siabram. Mnie krychu niazvykła, ja dzieviać miesiacaŭ byŭ u kamiery, tut adbyłasia takaja raźvirtualizacyja. Ja chaču skazać, što mianie vyzvalili vy — hramadzianskaja supolnaść. Ja nie hieroj. Hieroi — heta vy, usie žurnalisty. Tak jak sadžali mianie, mohuć pasadzić kožnaha z vas, chto piša ŭ internecie, chto pracuje ź infarmacyjaj.
My budziem zmahacca za kožnaha čałavieka, bo jašče zastajucca palitviaźni. Heta škodzić usim, nikomu nie patrebna, kab ludzi siadzieli za palityku ŭ turmie. Aproč palityčnych, u turmie vielmi šmat prostych ludziej, jakija siadziać praktyčna ni za što.
Ja ŭ ahramadnym daŭhu pierad vami, i mnie hety doŭh treba apracoŭvać. Dziakuj usim.
Bližejšy miesiac ja parazmaŭlaju z kožnym, usim adździaču».
«Pastaviš łajk i prakamienciš», — žartuje niechta z natoŭpu.
«Tak-tak», — adkazvaje Eduard.
«Taksama ja chaču vykazać spačuvańni ŭsim siabram i blizkim Paŭła Šaramieta, «Biełaruskamu partyzanu», «Ukrainskaj praŭdzie». Mnie da siońniašniaha nie vierycca, što jaho zabili. Kali jaho spravu najchutčej rasśledujuć, to budzie tolki lepš. Budziem staracca, kab heta nikoli nie było zabyta. Mnie zdajecca, što heta sprava honaru ŭsich žurnalistaŭ.
Ź mianie ŭziali haru padpisak, i mohuć znoŭ pasadzić, kali ja pačnu havaryć, što adbyvałasia za začynienymi dźviaryma. Było viesieła, zakryli praces, kab nie bačyli taho cyrku.
Ułady vyrašyli nie stvarać kanfliktnuju situacyju i dali mienš, čym patrabavaŭ prakuror. Ja dumaŭ, što daduć hady try, ale ŭsio pajšło bolš pazityŭna. Kali b nie było padtrymki, to mianie b cicha asudzili.
U SIZA ničoha nie źmianiłasia, porcyi bolšymi davać nie stali.
Jak noŭtbuki viernuć, tak i daviadziecca viartacca da pracy. U mianie 3 listapada sud, dzie mianie dalej buduć sprabavać zrabić ekstremistam, zabaranić sajt. Šou budzie praciahvacca.
Ciapier ja mahu dać kožnamu paroli ad sajta, zarablajcie svaje kryminalnyja spravy (śmiajecca).
U Biełarusi vielmi ŭmoŭnaja svaboda słova. Pytańnie tolki ŭ tym, kolki za jaje daduć.
Ja byŭ maleńkim błohieram, ale spadary ź siłavym struktur vyrašyli prapijaryć moj sajt, ciapier ja hladžu ŭ adny kamiery. Sami sabie stvaryli papularny sajt».
