Členy hramadskaj rady pry MUS, siarod jakich — staršynia Biełteleradyjokampanii Hienadź Davydźka, sustaršynia Biełaruskaha sajuza žančyn Antanina Morava i zasłužanaja artystka Biełarusi Iryna Darafiejeva, naviedali IČU i turmu № 4 u Mahilovie. Pra heta paviedamlaje pres-słužba MUS.
Fota: pres-słužba MUS Biełarusi
Členam rady pakazali adramantavany izalatar časovaha ŭtrymańnia. Mienavita siudy pastupajuć padazravanyja ŭ ździajśnieńni złačynstvaŭ. Naviedvalniki zaŭvažyli, što pavietra ŭ kamierach śviežaje, pamacali batarei — haračyja. U kožnaj kamiery jość radyjo, šaški, šachmaty, Kryminalny kodeks i mastackaja litaratura.
«Zazirnuli hości i ŭ stałovuju izalatara: na abied — kapusta, rysavaja kaša z katletaj i kampot. Darečy, cana trochrazovaha charčavańnia ludziej u IČU abychodzicca dziaržavie ŭ 10 rubloŭ 50 kapiejek na čałavieka ŭ sutki», — havorycca ŭ repartažy MUS.
Paśla IČU členy rady naviedali turmu № 4. U adnoj z kamier — 10 mužčyn, na stale knihi i žaleznyja kubki. Na pytańnie staršyni Biełteleradyjokampanii Hienadzia Davydźki «Ci jość skarhi?» adkazvajuć admoŭna; «Ci chapaje pavietra?» — stanoŭča.
Fota: pres-słužba MUS Biełarusi
«Ubačyŭšy ŭsio heta, ja dumaju, treba pravodzić ekskursii dla hramadzian prosta dla taho, kab razumieli, čym moža skončycca supraćpraŭnaje dziejańnie, — adznačyŭ prafiesar Mikałaj Ščokin. — Adno mahu skazać: dziaržava hodna ŭtrymlivaje tych, chto, mahčyma, i nie zasłuhoŭvaje takoha dohladu. Kali čałaviek kahości zabiŭ — to ŭtrymlivajuć jaho całkam humanna, nijakich abmiežavańniaŭ pravoŭ abo čahości padobnaha my tut nie ŭbačyli».
Fota: pres-słužba MUS Biełarusi
Haściam ustanovy taksama prapanavali pakaštavać turemny abied — sup, smažanina z salonym ahurkom, kampot z suchafruktaŭ, chleb.
Fota: pres-słužba MUS Biełarusi
«Charčavańnie na najvyšejšym uzroŭni, jak u restaranie, pryznajusia ščyra, ja navat pakaštavała — vielmi smačna», — adznačyła Iryna Darafiejeva, zasłužanaja artystka Biełarusi, a ciapier člen Pastajannaj kamisii Pałaty pradstaŭnikoŭ Nacyjanalnaha schodu pa adukacyi, kultury i navucy.
Abahulniajučy mierkavańni kalehaŭ, staršynia hramadskaj rady pry MUS Hienadź Davydźka adznačyŭ, što «turma pakinuła ŭražańnie vielmi dziełavoha asiarodździa».
Fota: pres-słužba MUS Biełarusi
«Takija miescy nie pavinny vyklikać pryjemnych emocyj, ale ŭmovy vielmi dobryja, pa čyścini, dyscyplinie, — adznačyŭ Davydźka. — Supracoŭniki viedajuć svaju pracu, viedajuć i tyja, što znachodziacca tut, za što siadziać i čamu, va ŭsim prysutničaje paradak i arhanizavanaść».
