Kali pisać historyju biełaruskaj rok-muzyki za apošnija 25 hadoŭ, heta lohka moža być historyja hurtu «Krama».
12 listapada ŭ minskim kłubie Prime Hall (pr.Pieramožcaŭ, 65) «Krama» śviatkuje 25-hodździe. U hości da Ihara Varaškieviča i kamandy pryjduć «Pałac», «Niejra Dziubiel», J:mors.
Napiaredadni my skłali Top-10 najlepšych piesień «Kramy» za 25 hadoŭ i prapanavali čytačam u kamientarach dapoŭnić jaho.
Čytačy pryhadali stolki piesień, što jany nie źmiaścilisia navat u Top-25!
Budziem spadziavacca, što astatnija kampazicyi pačujem na kancercie.
1. «Stefka»
Hetuju pieśniu, spadčynu hurtu «Bonda», čytačy zhadvali najčaściej.
«Dzie «Stefka»?! Ź jaje ja pačau słuchać biełaruski rok», —
napisaŭ čytač pad nikam Čorny Vojna.
«Krama», darečy, napisała sikveł hetaj pieśni — «Stefka praz 20 hod». Prypieŭ: «Chto viedaŭ, Stefka, što ja tak harełku palublu».
2. «Bejba»
Uspomnili i takuju pieśniu.
Adzin ź pieršych zapisaŭ «Kramy», u albomy nie trapiŭ.
3. «Polski biznes»
Fiejeryčnaja pieśnia, u jakoj źmiaściłasia cełaja epocha.
Muzyki «Kramy» i sami haniali ŭ postsacyjalistyčnuju Polšču handlavać.
Tamu śpiavali ź viedańniem spravy.
4. «Nieba — los arła»
Taki los — jon adzin
Na ŭvieś arliny viek.
5. «Dziaŭčynka»
Zacanicie klip.
Režyser — Andrej Laŭkovič.
6. «Što dapamoža nam»
Zahałoŭnaja pieśnia adnajmiennaha alboma 1998-ha. Na vokładcy, pomnicca, była vyjava dziaciej «kramaŭcaŭ».
Jakaść zapisu kancertnaja, ale jak impravizujuć muzyki!
7. «Lanivy taniec»
Z taho ž albomu.
Tekst — ilustracyja da časoŭ ekanamičnaha spadu 1990-ch.
Praŭda, aŭtar zaklikaje nie adčuvać z hetaj nahody prynižanaść, a tančyć.
8. «Čakaj»
«Mnie havoryć časta mama, paŭtaraje słovy tata — čakaj». Jašče adna viečnaja tema.
9. Karčma
Heta paźniej miedyjavisty pačali ramantyzavać korčmy.
U «Kramy» ŭsio było žorstka.
10. «Im nie treba moj bluz»
U hetaj pieśni z dalokaha 1994-ha aŭtary nibyta pradčuli źjaŭleńnie «čornych śpisaŭ» muzykaŭ u 2000-ch. Słovy Źmitra Łukašuka.
11. «Mama»
Biez kamientaryjaŭ.
12. «Svabody mnie daj»
Videašerah zmušaje ŭspomnić padziei 2006-ha: vybary, Milinkieviča i pieršuju biełaruskuju «Revalucyju Hodnaści».
13. «Novaja kroŭ»
«Zabytaja piesieńka ź pieršaha alboma, ale nadzvyčaj aktualnaja zaraz. Pierasłuchaŭ niadaŭna, až skałanuła», — napisaŭ kamientatar g-rub.
14. «Hej tam nalivaj»
Pieśnia jaŭna antyałkaholnaja, ale jaje časta razumiejuć niapravilna. Vykonvaje čałaviek-arkiestr Ihar Varaškievič.
15. Chicago nights
Pieśnia ŭsprymajecca jak łahičny praciah «Emihranckaj pieśni» Bahdanoviča i «Zoračak» Novika-Piejuna.
16. «Budź razam z nami»
Adna ź pieršych piesień «Kramy», jakaja «streliła» na radyjo i TV ŭ pieršaj pałovie 1990-ch.
Dla mnohich, chto čuŭ jaje tady, jana — uvasableńnie nadziei i atmaśfiery našaj ramantyčnaj niezaležnaści. Vašaj uvazie — videa ź pieršaj «Rok-karanacyi» 1995 hoda, jakuju, darečy, «Krama» i vyjhrała.
17. «Biažy, chłopiec»
Hetaja pieśnia nastolki čaplaje, što dziela jaje rasijski śpiavak Mikałaj Aruciunaŭ asvoiŭ azy biełaruskaj movy.
Heta vyhladała tak.
A voś — typovaja «Krama» i jaje fanaty.
18. «Vypi sa mnoj»
Hetaja dušeŭnaja i trochi depresiŭnaja pieśnia była napisanaja ŭ pieršaj pałovie 1990-ch i vyjšła na albomie «Chvory na rok-n-roł», ale dobra nakłałasia i na nastupny histaryčny pieryjad.
Jak bačym, dahetul nie hublaje aktualnaści.
Zapis 2014-ha.
19. «Homielski vals»
U klipie vykarystanaja chronika zabytaj siońnia trahiedyi — adsialeńnia ludziej z zabrudžanych čarnobylskaj radyjacyjaj viosak.
Klip, darečy, da 10-hodździa Čarnobylskaj katastrofy źniaŭ Jahor Chrustaloŭ, jaki paśla, kazali, režysiravaŭ parady na 3 Lipienia. U zapisie «Homielskaha valsa» ŭdzielničali hurt «Pałac» (my možam bačyć tam maładoha Źmitra Vajciuškieviča) i — razynka — hamialčuk Anatol Jarmolenka, jaki ŭ tyja časy jašče vielmi ŭmierana «słuchaŭ baćku».
20. «Słuckaja brama»
Adzin z hałoŭnych kramaŭskich «bajevikoŭ»
i, badaj, samaja histaryčnaja pieśnia ŭ hetym chit-paradzie. Jana dastałasia «Kramie» ad hurtu «Bonda», ź jakoha i pačałasia rok-muzyka pa-biełarusku. «Słuckaja brama» natchniaje ŭžo treciaje pakaleńnie słuchačoŭ.
21. «Kamiendant»
Chtości ličyŭ, što heta pieśnia pra minusy studenckaha žyćcia, ale bolšaść pabačyła ŭ joj šyrejšuju alehoryju.
Kampazicyja z adnajmiennaha alboma, jaki «Krama» stvarała ŭ sutareńniach piŭzavoda «Krynica».
Hurt mieŭ tam repietycyjnuju kropku i dostup da kranika z žyvatvornym napojem. Uvieś Miensk zajzdrościŭ!
22. «Chavajsia ŭ bulbu»
Nu jak moh kłasičny biełaruski hurt nie pryśviacić pieśniu adnamu z kłasičnych vidaŭ nacyjanalnaha sportu?
23. «Nieba»
Musić być i liryka,
nie ŭsio ž hramadskija prablemy. Heta tyčycca dźviuch nastupnych kampazicyj.
24. «Padaje doždž»
25. «Tvoj nakirunak»
Pieśnia ź śviežaha alboma «Biełaja vada».
Chto pavieryć, što «Kramie» — 25 hadoŭ?
