Student miedycynskaha ŭniviersiteta Aleh Kanapacki ŭ žniŭni jeździŭ na ŭkrainskaje telešoŭ «Rozśmiši komika», dzie jamu ŭdałosia raźviesialić sudździaŭ — prafiesijnych komikaŭ — i vyjhrać 20 tysiač hryvien (1480 biełaruskich rubloŭ). Vypusk prahramy z udziełam Aleha vyjšaŭ u efir 24 kastryčnika. Na hetym student nie płanuje spyniacca i ŭžo rychtujecca da supier-hulni, dzie zmoža vyjhrać 50 tysiač hryvien.
«My hladzieli ź dziaŭčynaj pa televizary «Rozsmiši komika», i ja padumaŭ, a čamu b i mnie nie paŭdzielničać. Čym chłopcy, jakija tam vystupajuć, lepšyja za mianie? Tak i źjaviłasia ideja pajechać u Kijeŭ i dakazać u pieršuju čarhu sabie, što ja taksama tak mahu», — raspaviadaje chłopiec.
Spačatku Aleh prajšoŭ kastynh, jaki adbyŭsia 6 žniŭnia. Da hetaha jon mieŭ try miesiacy, kab prydumać niezvyčajnyja žarty.
«Z hetym składanaściaŭ nie było, bo ja ŭvieś čas hulaŭ va ŭniviersiteckim KVK. Žarty prydumvalicia, a zatym praviaralisia na roznych uzrostavych aŭdytoryjach. Praz maje žarty prajšli baćki, dziaŭčyna, siabry. Paśla starannaha adboru žartaŭ ja ŭpeŭniena adpraviŭsia na zdymki».
Aleh byŭ pryjemna ździŭleny, paśla taho, jak ź piaci napisanych im listoŭ A4 z žartami, na šoŭ atrymałasia pračytać tolki dva.
«Ja nie praciahnuŭ hulać, bo heta byŭ moj pieršy padobny dośvied. Ja nie viedaŭ, jak paviaduć siabie komiki dalej: a raptam jany naohuł nie buduć śmiajacca? Ja vyrašyŭ, što lepš spynicca na 20 tysiačach. Mnie zdajecca, heta dobry vynik, jaki ja zrabiŭ za dźvie kartki A4. Astatnija try ja pakinuŭ na supier-hulniu, jakaja projdzie praź miesiac. Tam užo pasprabuju pazmahacca za 100 tysiač hryvien».
Vyjhranyja hrošy Aleh vydatkavaŭ na vučobu i dapamohu baćkam.
