Niadobrasumlennych subjektaŭ ahraekaturyzmu, jakija pieratvarajuć hety vid dziejnaści ŭ restaranna-hatelny biźnies, nieabchodna pieravodzić u razrad pradprymalnikaŭ, zajaviŭ namieśnik ministra sportu i turyzmu Michaił Partnoj 25 kastryčnika na kruhłym stale ŭ Minsku.
Pavodle jaho słoŭ, źmieny i dapaŭnieńni va ŭkaz № 372 «Ab mierach pa raźvićci ahraekaturyzmu ŭ Respublicy Biełaruś», jakija inicyjuje Ministerstva sportu i turyzmu, jak raz nie dazvolać «śpiekulavać» na sielskim turyźmie. Ciapier dakumient znachodzicca na razhladzie ŭ Saŭminie.
«Zhodna z ukazam, asnoŭnyja ŭmovy, jakija pavinien vykonvać uładalnik ahrasiadziby, — heta žyć u vioscy, vieści asabistuju padsobnuju haspadarku, vyrablać čystyja pradukty i adradžać siało i kulturnyja tradycyi, — skazaŭ Partnoj. — Asnoŭnaja masa sapraŭdy pravilna razumieje hety pasył, raźvivaje siało i ŭkładvaje dušu. Adnak źjavilisia działki, jakija vykarystali prabieły ŭ zakanadaŭstvie i padmianili dobruju hetuju ideju šarahovymi kamiercyjnymi prajektami. To bok ludzi zajmajucca restaranna-hatelnym biźniesam, paźbiahajučy vypłaty padatkaŭ».
Čynoŭnik zaznačyŭ, što ludziej, jakija sapraŭdy zajmajucca ahraekaturyzmam, dziaržava «budzie na rukach nasić, zdymać biurakratyčnyja pieraškody i dapamahać». Ale, zajaviŭ jon, «niadobrasumlennych działkoŭ nieabchodna pieravieści ŭ razrad pradprymalnickaj dziejnaści». Partnoj padkreśliŭ, va ŭkazie № 372 vyrazna prapisana, što ahraekaturyzm pradprymalnickaj dziejnaściu nie źjaŭlajecca.
«Na spravie što my bačym: adna mini-haścinica, druhaja, pobač dva kafe, bankietnyja zały na 200 miescaŭ. Ale płaciać adnu bazavuju vieličyniu ŭ hod. Treba ludziam mieć sumleńnie i nie abkradvać dziaržavu», — skazaŭ jon.
Prajektam ukaza ŭ śfiery ahraekaturyzmu Minsportu prapanoŭvaje ličyć pradprymalnickaj dziejnaściu: arhanizacyju viasiellaŭ i bankietaŭ, akazańnie pasłuh z vykarystańniem bolš za dziesiać žyłych pakojaŭ albo bolš čym 20 turystam adnačasova. Akramia taho, dakumient detalizuje punkt «dadatkovyja pasłuhi», z ukazańniem, jakija mienavita pasłuhi moža akazvać ahraekasiadziba. Taksama stavicca zachavańnie sanitarna-epidemijałahičnych patrabavańniaŭ. Jašče adna navina — raspaŭsiudžvańnie prefierencyj dla ahrasiadzib na kurortnyja zony.
Partnoj zaklikaŭ uładalnikaŭ ahrasiadzib vykazvać svajo mierkavańnie i vieści kanstruktyŭny dyjałoh pa prajekcie ŭkaza, jaki vyviešany na sajcie Minsportu ŭ adkrytym dostupie.
Na zakančeńnie namieśnik ministra pryvioŭ u prykład sielski turyzm Polščy, dzie subjektu sielskaha turyzmu prapanujecca piać sposabaŭ vypłaty padatkaŭ, a padatkovaja staŭka ŭzrastaje ad 0,18 da 32%. Pad pačatkovuju staŭku 0,18% traplajuć tyja, chto vykonvaje abaviazkovyja ŭmovy: viadzieńnie sialanska-fiermierskaj haspadarki z pražyvańniem u sielskaj miascovaści, zdajuć unajom nie bolš za 5 spalniaŭ u pamiaškańni, jakoje maje status žyłoha, i staviać metaj sielski adpačynak.
«Kali choć adzin z punktaŭ parušajecca, padatkovaja nahruzka idzie pa poŭnaj prahramie,—- skazaŭ jon. — Choć kropla śpirtnoha kapnuła — plus 8,5%, akazvaje haściničnyja pasłuhi — plus 18%».
