Źmieny i dapaŭnieńni va ŭkaz № 372 «Ab mierach pa raźvićci ahraekaturyzmu ŭ Respublicy Biełaruś» nie majuć na ŭvazie pavieličeńnia padatkaabkładańnia dla ŭładalnikaŭ ahrasiadzib, zajaviła namieśnik ministra pa padatkach i zborach Śviatłana Šaŭčenka 25 kastryčnika na pasiadžeńni kruhłaha stała ŭ Minsku.
Pavodle jaje słoŭ, padatkovy zbor dla ŭładalnikaŭ ahrasiadzib nie mianiaŭsia z 2006 hoda i z pryniaćciem novaha prajekta ŭkaza № 372 nie źmienicca. Jana padkreśliła, što ŭ 2006 hodzie padatkovaja nahruzka ŭ hetaj śfiery dziejnaści była 2%, siońnia — 0,003%.
«Z pryniaćciem novaha prajekta padatkaabkładańnie nie mianiajecca, — zajaviła jana. — U prajekcie ŭkaza takoha niama, i ŭ nas takoj mety siońnia niama. My havorym pra raźniavoleńnie dziełavoj inicyjatyvy».
Akramia taho, zaznačyła jana, padychod da viadzieńnia padatkovaj spravazdačnaści, jakuju dazvolena vieści ŭ advolnym paradku, taksama nie mianiaŭsia.
Šaŭčenka raskazała, što sielski turyzm z 2006 hoda staŭ burna raźvivacca, i ŭ 2010 hodzie ŭ padatkovyja orhany stali pastupać skarhi na niadobrasumlennych sub`iektaŭ haspadarańnia ŭ hetaj śfiery: «łaźnievy biźnies, praviadzieńnie viasiellaŭ u tak zvanych ahrasiadzibach i hetak dalej».
Tut, ličyć Šaŭčenka, nieabchodna va ŭkazie detalizavać punkt «inšyja pasłuhi» i vyrazna vyznačyć ich pieralik — jakija mienavita pasłuhi mohuć akazvać sub`iekty ahraekaturyzmu. Heta treba dla taho, kab navat u kantralujučych orhanaŭ nie było dvajakaha traktavańnia dakumienta. «Sub`iekt ahraturyzmu pavinien być abaronieny i nie pavinien bajacca za svoj zaŭtrašni dzień», — dadała namieśnik ministra.
Zhodna z prajektam ukaza ŭ śfiery ahraekaturyzmu Minsportu prapanoŭvaje ličyć pradprymalnickaj dziejnaściu: arhanizacyju viasiellaŭ i bankietaŭ, akazańnie pasłuh z vykarystańniem bolš za dziesiać žyłych pakojaŭ albo bolš čym 20 turystam adnačasova. Akramia taho, dakumient detalizuje punkt «dadatkovyja pasłuhi». Taksama stavicca zachavańnie sanitarna-epidemijałahičnych patrabavańniaŭ. Jašče adna navina — raspaŭsiudžvańnie prefierencyj dla ahrasiadzib na kurortnyja zony.
