Pierapis nasielnictva Biełarusi projdzie 4—30 kastryčnika 2019 hoda. Adpaviedny ŭkaz Alaksandr Łukašenka padpisaŭ 24 kastryčnika, paviedamiła pres-słužba kiraŭnika dziaržavy.
Pierapis budzie praviedzieny šlacham apytańnia śpiecyjalna padrychtavanym časovym pierapisnym piersanałam. Va ŭkazie vyznačany pieralik katehoryj hramadzian, jakija pryciahvajucca miascovymi vykanaŭčymi i rasparadčymi orhanami ŭłady dla praviadzieńnia pierapisu nasielnictva. Pryciahvać časovy pierapisny piersanał płanujecca na biazvypłatnaj asnovie z vyzvaleńniem ad pracy ci vučoby na pieryjad udziełu ŭ padrychtoŭcy i praviadzieńni pierapisu nasielnictva z zachavańniem miesca raboty (pasady) i vučoby, siaredniaha zarobku (stypiendyi), vypłaty piensii i dapamohi. Časovy pierapisny piersanał taksama budzie zastrachavany ad niaščasnych vypadkaŭ.
Dakumient nakiravany «na zabieśpiačeńnie adzinaha dla ŭsich dziaržaŭnych orhanaŭ padychodu da arhanizacyi i praviadzieńnia pierapisu, na apieratyŭnaje vyrašeńnie pytańniaŭ, źviazanych z padrychtoŭkaj i praviadzieńniem hetaha mierapryjemstva, a taksama atrymańnie ŭsiebakovych i abjektyŭnych vynikaŭ», adznačaje pres-słužba.
22 žniŭnia na pres-kanfierencyi ŭ Minsku staršynia Nacyjanalnaha statystyčnaha kamiteta Ina Miadźviedzieva paviedamiła, što ŭ kastryčniku 2017 hoda płanujecca pravieści probny pierapis nasielnictva ŭ Maładziečnie (Minskaja vobłaść). Adpracavanyja padčas jaje technałohii buduć vykarystanyja pry praviadzieńni nacyjanalnaha pierapisu 2019 hoda.
Pry hetym kiraŭnik Biełstata zaznačyła, što hramadzianie, jakija nie zachočuć puskać u chatu pierapisčykaŭ, buduć mieć mahčymaść zapoŭnić pierapisny list na stacyjanarnym učastku.
Miadźviedzieva taksama paviedamiła, što pierapis nasielnictva budzie sumieščany z apytańniem pa viadzieńni sielskaj haspadarki. «Heta budzie adzin z raździełaŭ pierapisnoha lista. U Biełarusi važna mienavita apytać nasielnictva, u jakoha jość asabistyja padsobnyja haspadarki, prysiadzibnyja ŭčastki, dačnyja ŭčastki. Heta toj płast ludziej, jakich my siońnia nie apytvajem. Jość vybaračnaje abśledavańnie asabistych padsobnych haspadarak, ale što tyčycca aharodnictva, sadavodstva, haradskich siadzibaŭ, to my dastatkovaj i poŭnaj infarmacyi nie majem», — adznačyła Miadźviedzieva.
Jana nahadała, što padčas pierapisu 2019 hoda ŭpieršyniu buduć vykarystanyja płanšety dla zapaŭnieńnia pierapisnych listoŭ. U 2015 hodzie ŭ Rasii prajšoŭ makrapierapis nasielnictva z vykarystańniem płanšetaŭ, i Biełstat płanuje vyvučyć hety vopyt.
Apošni pierapis nasielnictva Biełarusi prachodziŭ u 2009 hodzie.
