U Śvietłahorsku zatrymany mužčyna z hranataj F-1, paviedamiŭ supracoŭnik pres-słužby UUS Homielskaha abłvykankama Vital Prystromaŭ.
U subotu, 24 vieraśnia, Śvietłahorsk śviatkavaŭ 55-hodździe z dnia ŭtvareńnia. U 16.00 na stadyjonie pačaŭsia futbolny matč čempijanatu Biełarusi siarod kamand Pieršaj lihi pamiž miascovym FK «Chimik» i minskim FK «Zorka-BDU».
«Praz hadzinu paśla pačatku sustrečy milicyjanty, jakija ažyćciaŭlajuć propusk na stadyjon, zaŭvažyli mužčynu, jaki, chistajučysia, išoŭ da ŭvachodu. Ubačyŭšy, što pravodziacca nadhladnyja mierapryjemstvy, jon rezka paviarnuŭsia i nakiravaŭsia ŭzdoŭž płota stadyjona», — raspavioŭ Vital Prystromaŭ.
Mužčyna pavodziŭ siabie vielmi padazrona, byŭ mocna pjany. Kali jon pačaŭ pierałazić cieraz aharodžu, milicyjanty pryniali rašeńnie ab zatrymańni. Patrulnyja pryviali mužčynu da słužbovaha aŭtamabila i pry dahladzie znajšli ŭ kišeni štanoŭ bojeprypas, jaki nahadvaŭ hranatu F-1. Byli pryniatyja nieabchodnyja miery dla zabieśpiačeńnia biaśpieki, što dazvoliła nie pravodzić evakuacyju hledačoŭ i nie pieraryvać futbolny matč.
«Dla vyznačeńnia niebiaśpieki pradmieta i jaho likvidacyi była vyklikanaja sapiorna-piratechničnaja hrupa. Kanfiskavanaja «limonka» sapraŭdy akazałasia bajavoj hranataj F-1. Na ščaście, uzryvalnik byŭ prabitym, a voś načynka ŭjaŭlała realnuju niebiaśpieku», — udakładniŭ Vital Prystromaŭ.
Hranatu źniščyli na palihonie pad Śvietłahorskam.
U dačynieńni da 28-hadovaha žychara Śvietłahorska pravodziacca pravieračnyja mierapryjemstvy dla vyjaŭleńnia pryčyn i akaličnaściaŭ situacyi.
